Yanacaq qiymətlərinin artmasına və alıcılıq qabiliyyətinin azalmasına qarşı yüzlərlə etiraz aksiyasının gözlənildiyi Fransanın bir neçə şəhərində polislə etirazçılar arasında toqquşmalar baş verib.
Bu barədə Oxu.Az xarici KİV-ə istinadən məlumat verir.
Məlumata görə, Parisdə iki əsas etiraz yürüşü başlamazdan əvvəl polis əsasən silah və qadağan olunmuş qoruyucu vasitələr daşınmasına görə 40 nəfərin həbs olunduğunu açıqlayıb. Eyni zamanda, bir qrup etirazçı 10-cu rayonda toplaşıb və onların etiraz aksiyası tez zamanda polislə toqquşmaya çevrilib, hüquq-mühafizə orqanları gözyaşardıcı qazdan istifadə edib
Həmçinin ölkənin bir sıra şəhərlərində etiraz yürüşləri başlayıb. Marseldə nümayişçilər zibil qutuları və skuterlər vasitəsilə Prado bulvarını bağlayıblar və polisin müdaxiləsinə ehtiyac yaranıb. Lionda da polislər tərəfindən gözyaşardıcı qazın istifadəsi ilə toqquşmalar qeydə alınıb. Eyni zamanda şəhərin cənubunda polis Feyzen neft emalı zavodunun girişinin yanında toplaşmağa çalışan kiçik bir etirazçı qrupunu dağıdıb.
"La Provence" qəzetinin yazdığına görə, qiymətlərin artmasına qarşı aqressiv köklənən bir qrup etirazçı Marseldə şəhər meriyasının binasına soxulub və giriş qapısını sındırıb.
Bir neçə xuliqan şəhər administrasiyasının binasına daxil ola bilib və boya sprey balonları ilə divarları boyayıb. BFM TV-nin yaydığı videogörüntülərdə vandalların girişdə yerləşən və Fransanın milli simvollarından biri olan Mariannanın büstünü sındırdıqları kadrlar əks olunub.
Bu ana qədər xüsusi polis bölməsi binanı təhlükədən çıxarmağa müvəffəq olub və hazırda əllərində qalxan olan bir neçə polis girişi qoruyur. Bundan bir müddət əvvəl xuliqanlar, həmçinin Marselin mərkəzindəki bələdiyyə polisinin ərazisini də dağıdıb və bir neçə mağazanı talan ediblər.
Parisdə bir qrup etirazçı CNEWS telekanalı və "Europe 1" radiosunun redaksiyalarının yerləşdiyi binanın girişini bağlayıb.
Oxu.Az-ın xəbərinə görə, bu barədə "Le Parisien" nəşri məlumat verib.
Hüquq-mühafizə orqanlarındakı mənbə qəzetə bildirib ki, təxminən yüz nəfər insan binanın yaxınlığında toplaşıb. Onlar pəncərələrə daş atmağa başlayıb, ziyan vurublar. Həmçinin naməlum şəxslər binanın girişini də bloklayıblar. Hadisə yerinə gələn polis əməkdaşları etirazçıları bir neçə dəqiqə ərzində dağıdıblar, 21 nəfər saxlanılıb.
Fransada "payız etirazları" başlayandan bəri CNEWS telekanalının əməkdaşları məktəb və həmkarlar ittifaqı nümayişlərini işıqlandırmağa cəhd edərkən hücumlara məruz qalırlar. Aqressiv aksiya iştirakçıları jurnalistlərin canlı efirə çıxmasına mane olublar, kameraların obyektivlərini qapadaraq onları etiraz aksiyalarını tərk etməyə məcbur ediblər. Telekanal müntəzəm olaraq solçu fəalların tənqidləri ilə üzləşir, onların fikrincə, redaksiyalar sağçı siyasi baxışlara sahibdirlər və işıqlandırma zamanı dürüstlük, neytrallıq prinsiplərinə əməl etmirlər.
Qeyd edək ki, oktyabrın 17-də Parisdə və bütün Fransada yanacaq qiymətlərinin artmasına və əhalinin alıcılıq qabiliyyətinin azalmasına qarşı kütləvi etirazların keçirilməsi gözlənilir. İlkin hesablamalara görə, etirazlar təxminən 190 000 nəfər iştirak edə bilər ki, onlardan təxminən 40 000 nəfəri Parisdə olacaq. Etirazlarda taksi sürücüləri, səhiyyə, tikinti işçiləri, həmkarlar ittifaqı xadimləri, yuxarı sinif şagirdləri və "sarı jiletlilər" hərəkatının keçmiş iştirakçıları da daxil olmaqla, müxtəlif peşəkar və ictimai qrupların nümayəndələri iştirak edəcəklərini bildiriblər. Ölkənin Daxili İşlər Nazirliyi xüsusən də Parisdə və digər böyük şəhərlərdə iğtişaşlardan və ifrat solçu fəalların hücumlarından ehtiyat edir.
