Paşinyan tərəfdarlarını Gümrüdə seçkilər mövzusunu şişirtməməyə çağırdı

Ermənistanın baş naziri Nikol Paşinyan Gümrü şəhərində hakim Vətəndaş Sazişi Partiyasının (VSP) seçkidən sonra partiya yoldaşlarına aydın göstərişlər verib - bu mövzu ictimai şəkildə daha az müzakirə edilsin.

Oxu.Az-ın verdiyi məlumata görə, bu barədə "Iravunq" qəzeti hökumət başçısının ətrafındakı mənbələrə istinad edərək xəbər verib.

"Həqiqətlə üzləşmək vaxtı gəlib. Həqiqət isə budur ki, baş verənlərin əsas günahkarları sizsiniz", - deyə nəşr Paşinyanın VSP-nin Gümrü şöbəsinin nümayəndələrinə ünvanlanmış sözlərini sitat gətirib.

O da vurğulanıb ki, VSP-nin üzvləri də kuluarlarda Paşinyanın mövqeyindən narazılıqlarını ifadə edirlər.

"Hər şey onun ucbatından pozuldu, amma o hələ bizi nədəsə günahlandırır", - deyə baş nazirin partiya yoldaşları şikayətlənirlər.

Qeyd edək ki, Ermənistanın Mərkəzi Seçki Komissiyası 30 mart tarixində keçirilmiş Gümrü və Parakar bələdiyyə seçkisinin yekun nəticələrini açıqlayıb. Bu məlumatlara görə, Gümrüdə VSP Ağsaqqallar Şurasında 14 mandat qazanacaq, ardınca Ermənistan Kommunist Partiyası 8 mandatla gəlir.

Armavir vilayətinin Parakar birləşmiş icmasında səsvermənin nəticələrinə görə, VSP "Birlik" blokuna məğlub olub, nəticədə hakim qüvvə 7 mandat, alyans isə 12 mandat qazanıb.