Qazaxıstanın baş nazirinin müavini Kanat Bozumbayev AZAL təyyarəsinin Aktau yaxınlığında qəzaya uğraması ilə bağlı jurnalistlərin suallarını cavablandırıb.
Oxu.Az Tengrinews.kz-ə istinadən xəbər verir ki, brifinqdə ondan təyyarə qəzası ilə bağlı araşdırmanın nəticələrinin nə vaxt dərc olunacağı soruşulub.
Qazaxıstan rəsmisinin sözlərinə görə, birgə qərarların qəbulunu əlaqələndirmək üçün Braziliya, Rusiya və Azərbaycan ilə modul aviasiya bloku və GPS - qlobal mövqe təyinetmə sistemi ilə onlayn konfrans təşkil olunub.
"Bu modul aviasiya bölməsi Arizona ştatının Feniks şəhərinə (ABŞ) göndərilib. İndi biz onlardan analiz almalıyıq. Hesabatların formalaşdırılması üçün sənədlərin tədqiqi davam edir. Üç alt komitə var. Üç alt komitə üzrə hesabatlar formalaşdıqdan və bütün müayinələr başa çatdıqdan sonra komissiya yekun hesabatı yazmağa başlayacaq. Ümumiyyətlə, Beynəlxalq Mülki Aviasiya Təşkilatının bizdən tələbi bir il ərzində araşdırmanı başa çatdırmaqdır. Təəssüf ki, bu, bir yox üç-dörd tərəfdən asılı məsələdir. Buna baxmayaraq, biz bu il araşdırmanı tamamlamağa çalışacağıq", - deyə K.Bozumbayev bildirib.
Baş nazirin müavini əlavə edib ki, avadanlıqların bir hissəsi hələ də ekspertiza üçün xaricdədir. Həmin texnika yaxın vaxtlarda Qazaxıstana qayıdacaq.
Qazaxıstan Aktau yaxınlığında AZAL təyyarəsinin qəzaya uğraması ilə bağlı yekun hesabat hazırlayacaq.
Oxu.Az Qazaxıstan KİV-ə istinadən xəbər verir ki, bu açıqlama ilə Qazaxıstanın baş nazirinin müavini Kanat Bozumbayev çıxış edib.
"İstintaqın təhlil mərhələsi tamamlanır və yekun hesabatın hazırlanması mərhələsinə keçilir. Düşünürəm ki, səbir etmək lazımdır, bir neçə aydan sonra yekun hesabat hazır olacaq", - Kanat Bozumbayev AZAL təyyarəsinin qəzaya uğraması ilə bağlı aparılan araşdırmanın nəticələri haqqında danışarkən deyib.
Xatırladaq ki, 2024-cü il dekabrın 25-də səhər saatlarında AZAL-a məxsus sərnişin təyyarəsi Aktauda qəzaya uğrayıb. Təyyarədə 62 sərnişin və beş ekipaj üzvü olub. 27 sərnişin və iki ekipaj üzvü sağ qalıb, qalanları isə həlak olublar.
