İki il əvvəl Danimarka hökuməti "Şimal axını" qaz kəmərlərindəki partlayışların araşdırılması çərçivəsində dindirmələrin aparılmasında Almaniya polisinə dəstək göstərməyib.
Oxu.Az xəbər verir ki, bu barədə "Danmarks Radio" (DR) teleradioşirkəti Almaniya prokurorluğunun ittiham aktına istinadən məlumat yayıb.
Məlumata görə, Danimarka rəsmiləri dövlətin maraqlarına və təhlükəsizliyinə ehtimal olunan təhdid səbəbindən Bornholm adasında və Kristiansö arxipelaqında məsələni araşdırmaqdan boyun qaçırıblar.
İttiham aktına əsasən, Danimarka dövlət prokurorunun imtina qərarı 14 fevral 2024-cü il tarixinə aiddir. DR krallıq orqanlarından müvafiq sənədlərə baxış icazəsi tələb edib. Lakin jurnalistlərə "prokurorluqda belə bir sənədin tapılmadığı" cavabı verilib.
Xatırladaq ki, "Şimal axını" və "Şimal axını - 2" boru kəmərlərində təxribat 2022-ci il sentyabrın 26-da Baltik dənizində, Danimarkanın Bornholm adası yaxınlığında baş verib. Təxminən 80 metr dərinlikdə baş verən partlayışlar nəticəsində dörd magistral xətdən üçü zədələnib.
Almaniyanın istintaq orqanlarının məlumatına görə, bu təxribat ukraynalı dayverlər qrupu tərəfindən həyata keçirilib. İyul ayının sonunda Almaniyada Ukrayna vətəndaşı Sergey Kuznetsova qarşı hərbi cinayət ittihamı irəli sürülüb. O, Almaniya prokurorluğunun məhkəməyə ittiham aktı göndərdiyi "Şimal axını" partlayışları işi üzrə ilk təqsirləndirilən şəxs olub.
