Şolts Trampa meydan oxudu: "Bir neçə saata cavab verəcəyik"

Almaniya Kansleri Olaf Şolts ABŞ Prezidenti Donald Trampın bir neçə ölkədən mallara rüsumlar tətbiq etmək niyyətini tənqid atəşinə tutub.

Oxu.Az xəbər verir ki, O.Şolts bunu RND-yə müsahibəsində ABŞ-nin rüsumlarının ticarət müharibəsinə və dünya iqtisadi böhranına gətirib çıxara bilib-bilməyəcəyi barədə suala cavabında deyib.

O, qarşıdurmaya deyil, əməkdaşlığa ümid etdiyini vurğulayıb:

"Biz əlimizi uzadırıq, çünki rüsumlar heç kimə sərf etmir. Əgər ABŞ bu addımı atsa, Avropa Komissiyası bir neçə saat ərzində cavab verə biləcək".

Kansler hesab edir ki, dünya iqtisadiyyatına daha az ticarət əngəli lazımdır:

"Qloballaşma bütün dünyada rifahın xeyli artmasına gətirib çıxardı. Almaniya özünün ixrac sənayesi sayəsində bundan qazanır. Bundan sonra da belə qalmalıdır".