Türkiyədə zorlandıqdan sonra ölən iki yaşlı Sılanın anasına və təcavüzçülərə hökm oxundu

Türkiyənin Tekirdağ vilayətində cinsi istismar və zorakılıq nəticəsində həyatını itirən iki yaşlı Sılanın anasına və cinayətdə təqsirləndirilən uşaqlara hökm oxunub.

Oxu.Az bu barədə "En Son Haber"ə istinadla xəbər verib.

Bildirilir ki, 30 yaşlı Bakiye Yeniçeri üç ayrı cinayətdən ümumilikdə 27 il 9 ay müddətinə azadlıqdan məhrum edilib. Məhkəmə qərarı ilə təqsirləndirilən uşaqlar isə 17 və 7 il həbs cəzası alıblar.

Xatırladaq ki, qorxunc hadisə 2024-cü ilin sentyabrın 5-də baş verib. Ana bədənində zərbə izləri olan 2 yaşlı körpəsini hadisədən üç gün sonra xəstəxanaya aparıb. Sılanı müayinə edən həkim körpənin cinsiyyət nahiyəsində qançırlar görüb və vəziyyəti polisə bildirib, bundan sonra araşdırmalara başlanılıb.

Beyin qanaması şübhəsi ilə digər xəstəxanaya köçürülən və beyin əməliyyatı edilən körpə reanimasiya şöbəsinə yerləşdirilib, lakin onun həyatını xilas etmək mümkün olmayıb.

İstintaq çərçivəsində həbs edilən ananın prokurorluğa verdiyi ifadədə qorxunc faktlar ortaya çıxıb.

Onun sözlərinə görə, qonşuları onları axşam yeməyinə dəvət edib. Qadın daha sonra qızını qonşuda qoyaraq evə qayıtdığını və gecə saatlarında gedib götürdüyünü deyib. Uşağı çimizdirən zaman bezində qan ləkələri görüb və qızına təcavüz edildiyini başa düşüb. Lakin heç kim bundan xəbər tutmasın deyə vəziyyəti ört-basdır edib.

Hadisə ilə bağlı körpənin anası və anasının birlikdə yaşadığı kişi, ailənin qonşusu və qonşunun 13 və 14 yaşlarında oğulları olmaqla, 5 nəfər həbs edilib. Sılanın 5 yaşında bacısı isə dövlət himayəsinə götürülüb.

Araşdırma nəticəsində qonşunun 13 və 14 yaşlarında iki oğlunun Sılaya zorakılıq və təcavüz etdiyi, uşağın anasının, dini nikahda olduğu ərinin və qonşunun isə hadisəni ört-basdır etdiyi məlum olub.

Həmçinin 2 yaşlı körpənin təcavüzünə dair ortaya çıxan yeni təfərrüat dəhşətə gətirib. Belə ki, müayinə zamanı uşağın bədənində 42 diş izi aşkarlanıb. İzlərin 3 və 10 günlük olduğu müəyyən edilib.

Bu hadisə Türkiyədə böyük əks-səda doğurmuş, ictimaiyyət tərəfindən sərt tənqid olunmuşdu.