ABŞ Prezidentinin xüsusi elçiləri Stiven Uitkoff və Cared Kuşner üzərində Uitkoffun adı və "Zor gücünə sülh" ifadəsi həkk olunmuş xatirə sikkəsini Moskvaya gətiriblər.
Oxu.az xəbər verir ki, bu barədə "Yunaşev Live" "Telegram" kanalı məlumat yayıb.
Sikkənin üzərində, həmçinin Şimali və Cənubi Amerika təsvir olunub. Sikkənin kim üçün nəzərdə tutulduğu dəqiqləşdirilməyib.
Jurnalistin məlumatına görə, sikkənin üzərindəki yazı ABŞ-nin 40-cı prezidenti Ronald Reyqanın Soyuq müharibə dövründəki xarici siyasət konsepsiyasına işarə edir. İdeya ondan ibarətdir ki, davamlı sülhə yalnız hərbi və iqtisadi üstünlük vasitəsilə nail olmaq mümkündür.
ABŞ nümayəndə heyəti günün birinci yarısında Rusiyanın paytaxtına gəlib. Onları "Vnukovo" hava limanında Rusiya Birbaşa İnvestisiyalar Fondunun rəhbəri Kirill Dmitriyev qarşılayıb. Amerika nümayəndə heyəti gəldikdən sonra kortej ABŞ-nin Rusiyadakı diplomatik nümayəndəliyinin rəhbərinin iqamətgahına yollanıb.
ABŞ Prezidenti Donald Trampın açıqlamalarına görə, Kuşner və Uitkoffun səfərinin əsas məqsədi Ukrayna böhranının nizamlanması ilə bağlı təklifləri Rusiya tərəfinə təqdim etməkdir.
