Kann kinofestivalında iştirak edən venesuelalı gözəllik kraliçası hotel otağında hücuma məruz qalıb.
Oxu.Az "New York Post"a istinadən bildirir ki, taclı gözəl buna dair açıqlama yayıb.
Məlumata görə, "Miss Venesuela 2025" titulunu qazanan 29 yaşlı Andrea del Val sosial şəbəkələrdə qeyd edib ki, 33 yaşlı stilisti Covanni Laquna Fransada olarkən ona fiziki xəsarət yetirib.
Model üzündən qan axarkən özünü telefonla videoya çəkin və görüntüləri sosial media hesabında yayımlayıb. Çəkilişdə ispan dilində danışan del Val deyib:
"Baxın, bunu Covanni Laquna etdi. Təbriklər, Covanni, məhz bunu istəyirdim ki, əslində kim olduğunu nümayiş etdirəsən".
Daha sonra o, kameranı ətrafa çevirərək əşyaların və mebellərin hər tərəfə səpələndiyi, darmadağın edilmiş otağı göstərib.
Videoda Laqunanın isə otağın küncündə stulda əyləşdiyi görünür. Məlumata görə, lüks hotelin qonaqları qışqırıq, zərbə səsləri və fiziki mübarizə əlamətləri eşitdikdən sonra polisə müraciət ediblər və Covanni polis əməkdaşları tərəfindən aparılıb.
Laquna Latın Amerikasında bir çox məşhurların və gözəllik kraliçalarının stilisti kimi geniş tanınır.
O, 2023-cü ildən "Miss Universe Colombia" (Kainat Gözəli Kolumbiya) müsabiqəsinin yaradıcı direktoru vəzifəsini icra edir.
