Yekaterinburq məhkəməsi ağır cinayətlərdə ittiham olunduğuna görə görə azadlıqdan məhrum edilmiş Şahin Şıxlinskinin rəhbəri olduğu "Azərbaycan-Ural" ictimai milli-mədəni təşkilatının ləğvi barədə qərar çıxarıb.
Oxu.Az e1.ru-ya istinadən xəbər verir ki, müvafiq məhkəmə qərarı iyunun 3-də qəbul edilsə də, bu barədə məlumat ictimaiyyətə yeni açıqlanıb.
Məlumata əsasən, "Azərbaycan-Ural" təşkilatı 13 yanvar 2023-cü ildə Yekaterinburqda qeydiyyata alınıb. Bununla yanaşı, təşkilatın "Telegram" kanalında Şahin Şıxlinskinin hələ 2004-cü ildə sədr seçildiyi qeyd olunur.
Şıxlinski öz çıxışlarında bildirirdi ki, "Azərbaycan-Ural" cəmiyyəti Yekaterinburq və Sverdlovsk vilayətində yaşayan azərbaycanlılara dəstək göstərməklə məşğuldur.
Xatırladaq ki, 2025-ci il iyulun 1-i axşam saatlarında diaspor rəhbəri Şahin Şıxlinski və oğlu Mütvəli xüsusi təyinatlılar tərəfindən ailəyə məxsus "Baku Plaza" ticarət mərkəzinin yaxınlığında saxlanılıblar. Həmin vaxt Şıxlinskilər zirehli "Mercedes Gelandewagen" avtomobilində hərəkət edirdilər. Saxlanılma anını əks etdirən videoda tanınma nişanları olmayan kamuflyajlı şəxslərin maşına yaxınlaşaraq hərəkət halında şüşələri qırdığı görünür. Sürücü avtomobili geriyə sürən zaman güc strukturu əməkdaşlarından biri yerə yıxılıb. Daha sonra Şıxlinskilər qapıları açaraq maşından çıxarılıb və üzü üstə asfalta yıxılıblar. Mütvəli Şıxlinski qısa müddət sonra sərbəst buraxılıb, Şahin Şıxlinski isə Sverdlovsk vilayəti üzrə İstintaq Komitəsinə aparılıb. Həmin ilin 16 iyul tarixində məhkəmədə Mütvəli barəsində həbs qətimkan tədbiri seçilib, atası isə Moskvaya yollanıb.
Avqustun 2-də Şahin Şıxlinski hüquq-mühafizə orqanlarına təslim olub. Məhkəməsinin qərarı ilə o da həbs edilib. Şıxlinskilər qətl və sui-qəsdlərin təşkilində təqsirli bilinərək uzunmüddətli həbs cəzalarına məhkum olunublar. Bundan əlavə, onlar saxlanılarkən avtomobillə vurduqları hakimiyyət nümayəndəsinə qarşı zorakılıq maddəsi ilə də mühakimə ediliblər. Mütvəli ümumi rejimli cəzaçəkmə müəssisəsində 8 il, atası isə ilk 4 ili həbsxanada olmaqla ümumilikdə 24 il müddətinə azadlıqdan məhrum edilib. Məhkəmə həmçinin digər azərbaycanlılar barəsində də hökm çıxarıb. Onların hər biri aşağıdakı müddətlərə azadlıqdan məhrum ediliblər:
Akif Səfərov - 21 il;
Bəkir Səfərov - 10 il;
Ayaz Səfərov - 20 il;
Kamal Səfərov - 14 il;
Məzahir Səfərov - 13 il;
Şadjayəddin Rəcəbov - 14 il.
Qeyd edək ki, istintaq Şahin Şıxlinskinin 2001-ci ildə sahibkar İkram Paşayevin qətlini təşkil etməkdə və Fəhruz Şirinova qarşı sui-qəsddə iştirak etdiyini ehtimal edirdi. Şirinov killerin silahında yaranan nasazlıq səbəbindən sağ qalmışdı. Bu cinayət işi 15 ildən sonra yenidən bərpa edilmişdi.
