Rəsmi qüvvələrlə Yəmənin cənub-şərqində baş verən döyüşlər zamanı "Ənsar Allah" hərəkatının tərəfdarları təxminən 800 nəfəri əsir götürüblər.
Oxu.Az "Al Mayadeen" telekanalına istinadən xəbər verir ki, bunu husilərin yaratdığı Hərbi Əsirlərlə İş üzrə Komitənin rəhbəri Əbdülqadir Murtəda bildirib.
"Qırmızı dənizin qərb sahilində keçirilən hərbi əməliyyat zamanı "Ənsar Allah" dəstələri 800 nəfəri əsir götürüblər", - deyə Murtəda bildirib.
O əlavə edib ki, "Ənsar Allah" Ali Siyasi Şurasının sədri Mehdi əl-Məşat "aldadılaraq husilərə qarşı döyüşlərə cəlb edilənlərə silahlarını yerə qoyub evlərinə qayıtmaq şərti ilə" ümumi amnistiya elan edib.
Yəməndə münaqişənin nizamlanması ilə bağlı regional təşəbbüslərə toxunan Murtəda bildirib ki, "təcavüzün dayandırılmasına və Yəmənə qarşı blokadanın aradan qaldırılmasına yönəlmiş ərəb ölkələrinin istənilən səyləri qəbul edilir və alqışlanır".
