Ötən il altı min ailə aktivlərlə təmin olunub və bu il ərzində 10 min ailə mikrotəsərrüfatlarla təmin olunacaq. Gələcəkdə isə bu rəqəmin 15 minə çatdırılması nəzərdə tutulur.
Oxu.Az-ın məlumatına görə, bunu Əmək və Əhalinin Sosial Müdafiəsi naziri Sahil Babayev Sahibkarlar gününə həsr olunan tədbirdə bildirib.
Onun sözlərinə görə, bu gün ölkədə məşğulluq bazarı dinamikdir və 10 minlərlə yeni əmək qüvvəsi bazara daxil olur:
“Məşğulluq alt sistemi vasitəsilə işsizlər haqqında bütün məlumatlar əlçatan olub. Bu sistemin davamı olaraq məşğulluq proqramları və mexanizmi qısa müddətdə təqdim olunacaq”.
“Bu ilin beş ayı ərzində əmək müqavilələrinin sayı 95 mindən artıq olub. Bu da əvvəlki illərlə müqayisədə, olduqca artıqdır. Bu sahədə 17-18 faizlik artım onu deməyə əsas verir ki, sahibkar, özəl sektorlar şəffaf şəkildə işləməyə çalışırlar. Bu artım tendensiyasının daim davam edəcəyi proqnozlaşdırılır”, - deyə nazir qeyd edib.
İlhamə Əbülfət
