Azərbaycanda çipsin vergiyə cəlb olunmasının səbəbi açıqlanıb.
Oxu.Az xəbər verir ki, bu barədə Dövlət Vergi Xidmətinin Vergi siyasəti baş idarəsinin rəisi Nicat İmanov Milli Məclisin İqtisadi siyasət, sənaye və sahibkarlıq komitəsinin bugünkü iclasında müzakirəyə çıxarılan Vergi Məcəlləsinə və bir neçə qanuna təklif edilən dəyişiklik layihəsinin müzakirəsi zamanı danışıb.
O bildirib ki, şirniyyatlaşdırılmış mineral qazlı içkilər aksizli malların dairəsinə daxil edilir:
"Bu cür məhsullar müxtəlif ölkələrin təcrübəsində çox geniş yayılmış dünya praktikadır və nəzərdə tutulmuş aksizin dərəcəsi spesifik hesablanma qaydasında, yəni istehsal edilmiş məhsulun həcminin hər litrinə görə 10 qəpik məbləğində aksiz tətbiq ediləcəkdir. Eyni zamanda çipslər aksizli malların dairəsinə daxil edilir. Çipslərə münasibətdə isə bir kq-ya bir manat məbləğində aksizin tətbiqi nəzərdə tutulur. Əlbəttə ki, bu cür məhsullar ümumilikdə götürüldükdə həm də zərərli mallar kateqoriyasına daxil edilir. Ancaq məqsəd burada o deyil, əsas həm də bu cür məhsullar üzərində beynəlxalq təcrübədə geniş yayılmış praktikanın - vergi siyasətinin tətbiq edilməsidir".
