"Orta aylıq pensiyanın məbləği ötən ilin müvafiq dövrünə nisbətən 10.4% artaraq 596 manata, yaşa görə pensiyanın orta məbləği isə 10% artaraq 634 manat, orta aylıq əməkhaqqı 7.2% artaraq 1173 manata çatıb. Müavinət, təqaüd və ünvanlı dövlət sosial yardımı üzrə ödənişlər isə 8.4% artaraq 1.9 milyard manat olub".
Oxu.Az xəbər verir ki, bunu əmək və əhalinin sosial müdafiəsi naziri Anar Əliyev Milli Məclisin Təbii ehtiyatlar, energetika və ekologiya, Əmək və sosial siyasət, Səhiyyə, Beynəlxalq münasibətlər və parlamentlərarası əlaqələr komitələrinin birgə iclasında çıxışı zamanı deyib.
Onun sözlərinə görə, nazirlik tərəfindən əhalinin 22%-nə, yəni 2.2 milyon şəxsə 900 milyon manat məbləğində aylıq əsasda ödəniş edilir ki, bunun 676 milyon manatı pensiya və sosial sığorta ödənişlərinin, 214.3 milyon manatı isə dövlət büdcəsi hesabına ödənilən sosial müavinət, Azərbaycan Prezidentinin təqaüdü və sosial yardımın payına düşür:
"2027-ci ilin dövlət büdcəsinin layihəsində Nazirliyin fəaliyyət istiqamətləri üzrə əhaliyə ödənişlərin, tibbi sığorta xərclərinin, habelə haqqı ödənilən ictimai işlərin maliyyələşdirilməsi üçün 5 milyard 503 milyon manat vəsaitin ayrılması nəzərdə tutulur".
