Paraqvay Baş Prokurorluğu "Ueno Bank S.A." bankı ətrafındakı vəziyyətlə bağlı araşdırma çərçivəsində ölkə Prezidenti Santyaqo Penya və keçmiş məmurlara qarşı cinayət işləri qaldırıb.
Oxu.Az-ın xəbərinə görə, bu barədə nəzarət qurumunun "X" sosial şəbəkə hesabında məlumat yerləşdirilib.
Məlumata görə, baş prokuror Emiliano Fernandes üç işin açılmasını əmr edib. İstintaq, həmçinin müxtəlif dövlət qurumlarının hazırkı və keçmiş vəzifəli şəxslərinin hərəkətlərini də araşdıracaq. Baş Prokurorluq bildirib ki, istintaq üçün əsaslardan biri daha əvvəl 2025-ci il oktyabrın 22-də Penya barəsində verilmiş şikayətin genişləndirilməsidir.
Şikayətə "Ueno Bank"a nəzarət və dövlət vəsaitlərinin banka yerləşdirilməsi ilə bağlı məlumatlar da əlavə edilib. Digər şikayət prezident, vitse-prezident Pedro Alyana, Mərkəzi Bankın, Sosial Sığorta İnstitutunun və digər qurumların nümayəndələri və keçmiş rəhbərləri ilə bağlıdır.
Bank qalmaqalı fonunda Santyaqo Penya istefa verdiyini bəyan edib və vətəndaşlardan onları aldatdığını düşünürlərsə, üzr istəyib. O elan edib ki, bu qərarı ölkənin sabitliyi naminə verib və "Ueno Bank" əmanətçilərinə onların əmanətlərin qaytarılmasını özünün prioriteti adlandırıb.
Paraqvaydakı siyasi böhran Penyanın investoru olduğu "Ueno Bank"ın iflas prosedurunun başlanması ilə əlaqədar baş qaldırıb. Bank ətrafında qalmaqal kredit təşkilatının sahibləri ilə əlaqəli şirkətlərə böyük miqdarda təminatsız kreditlərin verilməsi ittihamları ilə əlaqələndirilir.
Bank təxminən 3 milyon müştəriyə - ölkənin yetkin əhalisinin təxminən 60%-nə xidmət göstərirdi və 850 milyon dollara qədər məbləğdə dövlət vəsaitini idarə edirdi.
