"Bakının Xətai rayonu, Əhmədli qəsəbəsindəki təbiət hadisəsi baş verən hissə sürüşmə ərazisi deyil".
Bunu Oxu.Az-a açıqlamasında Elm və Təhsil Nazirliyinin akademik Həsən Əliyev adına Coğrafiya İnstitutunun şöbə müdiri Ənvər Əliyev deyib. O bildirib ki, həmin ərazidə təhlükə qalmaqdadır:
"Bura sürüşmə zonası deyil. Ola bilsin ki, tökülmə torpaqdır. Amma ərazidə yenə də təhlükə var, diqqətli olmaq lazımdır. Hazırda yenə də qopma xətləri var, su sızmasından yaranıb. Ona görə də yenidən sürüşmələr ola bilər".
Ə.Əliyev, həmçinin qeyd edib ki, ərazidəki suvarma boruları dəyişdirilməlidir.
Samir Əli
Xətai rayonu, Əhmədli qəsəbəsində baş verən torpaq sürüşməsinə səbəb olan ərazidən magistral su xətti keçmir.
Bunu Oxu.Az-a İri Şəhərlərin Birləşmiş Su Təchizatı Xidmətindən məlumat verilib. Məlumatda bildirilir ki, qeyd edilən ərazidən Xətai Rayon Sukanal İdarəsinə məxsus heç bir su xətti keçmir. Həmin ərazidə sızma park ərazisindəki daxili xətlərdə baş verib.
Xətai Rayon İcra Hakimiyyətinin sözçüsü Pənah İmanov isə Oxu.Az-a açıqlamasında bildirib ki, həmin ərazinin suvarılması üçün daxili xətlər çəkilib:
"Daxili xətlərdən birində beş verən qəza nəticəsində ərazidə sürüşmə olub. Xətt bərpa olunub və qəza aradan qaldırılıb".
Xətai rayonunda torpaq sürüşməsi ərazidən keçən magistral su xəttindəki qəza və sızma nəticəsində baş verib.
Oxu.Az-ın məlumatına görə, bu barədə Xətai Rayon İcra Hakimiyyətindən məlumat verilib.
Bildirilib ki, xətdə baş verən sızma nəticəsində torpaq qatı sürüşüb. Artıq problem aradan qaldırılıb, su xətti bərpa olunub. Hazırda ərazidə təmizlik işləri görülür.
Daha çox foto burada: PhotoStock.az
Samir Əli
Bakı şəhəri, Xətai rayonu, Əhmədli qəsəbəsində baş verən torpaq sürüşməsi ilə bağlı araşdırma aparılır.
Bu barədə Oxu.Az-a Geoloji Kəşfiyyat Agentliyinin İdarə Heyətinin sədri Əli Əliyev məlumat verib.
O bildirib ki, baş verən sürüşmə hadisəsi ilə bağlı Ekologiya və Təbii Sərvətlər Nazirliyinin Geoloji Kəşfiyyat Agentliyinin mütəxəssisləri hazırda hadisə yerindədirlər. Ərazidə araşdırma və monitorinqlər aparılır, nəticələr barədə məlumat veriləcək.
Aygün Mirakif
Bakı şəhəri, Xətai rayonu, Əhmədli qəsəbəsində torpaq sürüşməsi baş verib.
Oxu.Az "Qafqazinfo"ya istinadən xəbər verir ki, hadisə Vunq Tau küçəsində yerləşən 9 saylı Uşaq Poliklinikasının həyətində qeydə alınıb.
Sürüşmə nəticəsində torpaq qatı poliklinikanın həyətindəki maşının üzərinə tökülüb.
İlkin ehtimala görə, hadisəyə gecə saatlarında ərazidə yaşıllıqların həddindən artıq suvarılması səbəb olub.
