Bakıda vətəndaşlara ev tikmək adı ilə dələduzluq etməkdə təqsirləndirilən şəxs azadlığa buraxılıb.
Oxu.Az-ın məlumatına görə, Bakı şəhər sakini Pərviz Ağayev (soyadı şərtidir) paytaxtın Sabunçu rayonu, Zabrat qəsəbəsində yerləşən ticarət mərkəzinin 4-cü mərtəbəsində özünə ofis götürərək "Alfa Təmir Tikinti" MMC yaratdığını bəyan edib. O özünü "TikTok" və digər sosial şəbəkələrdə reklam edərək kreditlə ev tikdiyini bildirib.
Elə hər şey də bundan sonra başlayıb. Ağcabədi rayon sakini Aytac Məmmədova sosial şəbəkə üzərindən Pərvizlə əlaqə saxlayıb ev tikdirmək istədiyini bildirib. Pərviz "Rent a Car"dan bahalı avtomobil kirayə götürərək Ağcabədi rayonuna gedib, Aytac və onun ailəsi ilə görüşüb, onları inandırmağa çalışıb. O, ilkin olaraq Aytacdan 10 min manat alıb və ümumi evi 32 min manata tikib təhvil verəcəyini bildirib. Şifahi razılığa görə, Pərviz evi 3 ay müddətinə tikib, təmir edib Aytaca təhvil verməli olduğu halda, bir neçə ay keçsə də, ev hazır olmayıb. Aytac evin tikintisi ilə maraqlansa da, Pərviz ona nə evi, nə də onun tikintisini göstərməyib.
Nəticədə Aytac hüquq-mühafizə orqanlarına müraciət edib və fakta görə cinayət işi başlanıb, Pərviz barədə həbs qətimkan tədbiri seçilib.
İstintaq zamanı məlum olur ki, Pərviz Ağayev Aytacdan başqa daha iki ailəni aldadıb və onların hər birindən 10 min manat alıb. O, həmin ailələrlə görüşüb Abşeron rayonunun Digah qəsəbəsində başqa şəxsə məxsus olan 6 sot torpaq sahəsini göstərib və həmin ərazidə guya ev tikəcəyinə inandırıb. Bu məqsədlə o, iki ailədən ümumilikdə 20 min manat alıb.
Sabunçu Rayon Məhkəməsində keçirilən prosesdə məlum olub ki, Pərviz Ağayev Aytacla razılıq əldə edib və zərərçəkmişin ondan şikayəti yoxdur.
Məhkəmə P.Ağayev barədə hökm elan edib. Məhkəmənin hökmü ilə P.Ağayevə 3 il azadlığın məhdudlaşdırılması cəzası verilir və o, məhkəmə zalında azadlığa buraxılıb.
Samir Əli
