Bu gün saat 01:20-də Bərdə Rayon Mərkəzi Xəstəxanasının Təcili və təxirəsalınmaz tibbi yardım şöbəsinə üç nəfər (kişi cinsli) hospitalizasiya olunub.
Oxu.Az xəbər verir ki, bu barədə APA-nın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) bildirilib.
Müxtəlif dərəcəli yanıq xəsarətləri ilə tibb müəssisəsinə yerləşdirilən şəxslərə zəruri tibbi xidmətlər göstərilib və ambulator müalicə üçün evə buraxılıblar.
Bərdə rayonu Mollaisalar kəndi ərazisində avtomobil qaz xəttinə çırpılıb, beş kəndin qaz təminatı dayanıb.
Oxu.Az "Report"a istinadla xəbər verir ki, yanvarın 13-də gecə saatlarında "Hyundai Accent" markalı minik avtomobili idarəetmədən çıxaraq yolun kənarındakı qaz xəttinə çırpılıb.
Qəza nəticəsində qaz xəttində yanğın baş verib. Yanğın Fövqəladə Hallar Nazirliyinin Dövlət Yanğından Mühafizə Xidmətinin qüvvələri tərəfindən söndürülüb.
Əldə edilən məlumata görə, qəza nəticəsində 108 mm-lik qaz xəttinə, həmçinin Qaz Tənzimləyici Məntəqəyə ziyan dəyib. Nəticədə Mollaisalar, Kolayır, Mollaməmmədli, Gülgəzli, Sərkarlar kəndlərinə təbii qazın verilməsi dayanıb.
Hazırda qaz təchizatının bərpası üçün işlər davam edir.
