"Araz-Naxçıvan" klubunun braziliyalı yarımmüdafiəçi Vanderson Meloya görə "Rasinq" klubuna 67 min ABŞ dolları ödədiyi iddia olunub.
Bunun səbəbi isə yarımmüdafiəçi ötən mövsüm başlamamışdan öncə Livanın "Rasinq" klubu ilə ilkin müqavilə imzalasa da, sonradan muxtar respublika təmsilçisinə keçməsi olub. Bu səbəbdən də Beyrut klubu həm futbolçudan, həm də "Araz-Naxçıvan"dan şikayət etmişdi. "Rasinq" "Araz-Naxçıvan"ın 67 min dollar ödəməsini tələb edib. Əks təqdirdə, Azərbaycan klubunun və Vanderson Melonun cəzalanmasını FIFA-dan tələb etməsi ilə hədələyib. Daha sonra yayılan xəbərlərdə "qırmızı-bəyazlar"ın 67000 dolları Beyrut klubuna ödədiyi, lakin klubun bu pulu futbolçunun maaşından tutacağı deyilib.
Bu barədə Oxu.Az saytına açıqlama verən "Araz-Naxçıvan" klubunun icraçı direktoru Elgiz Yusubov bildirib ki, Muxtar Respublika təmsilçisi tərəfindən Livan təmsilçisinə heç bir ödəniş olunmayıb.
"Venderson Melonun "Rasinq" klubuna cəza ödəyəcəyi xəbəri doğrudur. Amma bizim tərəfimizdən Beyrut klubuna heç bir ödəniş edilməyib. Hətta 67 min dollar məbləği də tam olaraq real deyil. Biz klub olaraq heç bir ödəniş etməmişik, bu öhdəlik futbolçunun özünə aiddir. Biz sadəcə ona bu prosedurda köməklik göstərmişik".
Qeyd edək ki, "Araz-Naxçıvan" braziliyalı ilə birmövsümlük yeni müqavilə imzalayıb.
Anar Həsənov
