Azərbaycanda badminton üzrə dünya və Avropa çempionatı keçirilə bilər

Avropa Badminton Konfederasiyasının baş katibi Brayan Aqerbak Bakıda keçiriləcək “Azerbaijan International 2019” turniri ilə bağlı danışıb.

Oxu.Az xəbər verir ki, danimarkalı mütəxəssis Bakıda badminton üzrə Avropa və dünya çempionatının keçirilə biləcəyini istisna etməyib: 

“Növbəti il Bakıda keçiriləcək turnirdən gözləntilərimiz böyükdür. Mən ilk Avropa Oyunları zamanı Bakıda oldum. Azərbaycanın böyük və nüfuzlu idman tədbirlərini necə yüksək səviyyədə təşkil etdiyinin əyani şahidiyəm. Bu mənada, böyük təcrübə və hazır idman infrastrukturu var. Avropa Oyunlarından da miras qalıb.

Azərbaycan Badminton Federasiyası inkişaf edir və bu cür böyük idman yarışlarını təşkil etməyə hazır olduğunu düşünürəm. Avropa Oyunlarında qazanılan böyük təcrübə bu kimi idman tədbirlərinin təşkilində böyük rol oynayır. Düşünürəm ki, badminton üzrə beynəlxalq turnir də ən yüksək səviyyədə təşkil olunacaq. 

İnfrastruktur və böyük beynəlxalq təcrübəyə əsaslanaraq, deyə bilərəm ki, gələcəkdə Bakıda badminton üzrə Avropa və dünya çempionatı keçirilə bilər. Xüsusilə qeyd etməliyəm ki, Azərbaycanda idmana böyük diqqət ayrılır. İlk Avropa Oyunlarından sonra azərbaycanlı badmintonçular beynəlxalq turnirlərdə yaxşı mübarizə aparırlar.

Azərbaycan Badminton Federasiyası Avropa Badminton Konfederasiyasının ümumi fəaliyyətində, illik tədbirlərimizdə fəal iştirak edir. Ümumi əməkdaşlığa dostcasına töhfə verir. Azərbaycan Badminton Federasiyası Avropa badminton ailəsinin çox əhəmiyyətli tərəfdaşıdır və bu əməkdaşlığın gələcəkdə də davam edəcəyinə inanıram”.

Qeyd edək ki, “Azerbaijan International 2019” badminton turniri 2019-cu il 6-9 iyun tarixlərində keçiriləcək. Beş kateqoriya üzrə qalib və mükafatçıların müəyyənləşəcəyi yarışın ümumi mükafat fondu 25 min ABŞ dollarıdır.

Səbuhi MUSAYEV
www.oxu.az