Cüdo millimizdən Budapeştdə keçirilən dünya çempionatına uğursuz start

İdmançılarımız Macarıstanın paytaxtı Budapeştdə keçirilən cüdo üzrə dünya çempionatına uğursuz başlayıblar.

Oxu.Az xəbər verir ki, yarışın ilk günündə mübarizəyə başlayan üç cüdoçumuz yarışı erkən başa vurub.

Belə ki, 60 kiloqram çəkidə mübarizəyə başlayan Əhməd Yusifov 1/16 finalda yaponiyalı rəqibi Ryuju Naqayamaya uduzub.

48 kiloqram çəkidə mübarizə aparan Leyla Əliyeva isə 1/32 finalda türkmənistanlı Kurbanay Kurbanova ilə qarşılaşmada qələbə qazansa da, ikinci qarşılaşmasında Laura Martinesə (İspaniya) uduzub.

Eyni çəkidə mübarizə aparan Könül Əliyeva isə 1/32 finalda ABŞ təmsilçisi Mariya Seliya Laborde ilə üz-üzə gəlib və məğlub olub.

09:52

Bu gün Macarıstanın paytaxtı Budapeştdə cüdo üzrə böyüklər arasında dünya çempionatına start veriləcək.

Oxu.Az xəbər verir ki, ilk yarış günündə Azərbaycanın üç cüdoçusu mübarizə aparacaq.

Əhməd Yusifov (60 kq) 1/16 finalda yaponiyalı Ryuju Naqayama ilə üz-üzə gələcək.

Leyla Əliyeva (48 kq) 1/32 finalda türkmənistanlı Kurbanay Kurbanova ilə qarşılaşacaq.

1/32 finaldan başlayacaq Könül Əliyeva (48 kq) isə ABŞ təmsilçisi Mariya Seliya Labordeni məğlub etməyə çalışacaq.

Qeyd edək ki, mundialda Azərbaycanı 10 çəki dərəcəsində 13 cüdoçu (9 kişi, 4 qadın) fərdi yarışlarda təmsil edəcək. Yığmamız, həmçinin qarışıq komanda yarışında mübarizə aparacaq.