Blatterlə Platini yenidən məhkəmə qarşısında – İki milyonluq fırıldaqda ittiham olunurlar

FIFA və UEFA-nın keçmiş prezidentləri Yozef Blatterlə Mişel Platini yenidən İsveçrədə məhkəmə qarşısına çıxıblar.

Oxu.Az xəbər verir ki, Yozef Blatter və Mişel Platini 2011-ci ildə FIFA-nın hesabından ikincinin xeyrinə qanunsuz olaraq 2 milyon İsveçrə frankı (1,8 milyon avro) köçürməkdə ittiham olunurlar.

2022-ci ildə hər iki keçmiş funksioner bəraət qazanıb. Lakin İsveçrə prokurorluğu bəraətdən apellyasiya şikayəti verib. İndi işə İsveçrə Cinayət Məhkəməsinin Apellyasiya Palatası baxır. İttiham tərəfi ödənişin qanunsuz olduğunu və FİFA-ya maddi ziyan vurulduğunu bildirir.

Prokurorluq Blatter və Platiniyə 20 ay həbs cəzası tələb edir. Təqsirləndirilən şəxslər ittihamları rədd edərək, bu vəsaitin konsaltinq xidməti üçün ödəndiyini deyirlər.

Məhkəmənin martın 6-na kimi davam edəcəyi, hökmün martın 25-də veriləcəyi gözlənilir.