Braziliya yığmasına baş məşqçinin yerinə namizədin adı açıqlandı

Braziliya yığmasının mümkün yeni məşqçisinin adı məlum olub. Belə ki, 62 yaşlı Dorival Junioru vəzifəsində "Əl-Hilal"ın məşqçisi Jorji Jezuş əvəz edə bilər.

Oxu.Az-ın məlumatına görə, bu barədə insayder Nikolo Skira "X" hesabında bildirib.

Onun sözlərinə görə, 70 yaşlı portuqaliyalı ilə artıq danışıqlar aparılır.

Qeyd edək ki, Braziliya Futbol Federasiyası milli komandanın baş məşqçisi Dorival Junioru işdən azad edib.

Dorival 2024-cü ilin əvvəlində Braziliya yığmasına rəhbərlik etməyə başlayıb. Onun rəhbərliyi altında keçirilən 16 matçda komanda yeddi qələbə qazanıb, altı dəfə heç-heçə edib və üç məğlubiyyətə uğrayıb.

Jezuş 2023-cü ilin yayında "Əl-Hilal"a rəhbərlik etməyə başlayıb, onun müqaviləsi bu yaya qədər nəzərdə tutulub. 25 turdan sonra onun rəhbərlik etdiyi komanda Səudiyyə Ərəbistanı çempionatının turnir cədvəlində ikinci yerdə gedir.