Konqo Demokratik Respublikası (DR) millisi ("The Leopards" - Bəbirlər) Afrika futbolunun ən xaotik, fiziki cəhətdən ən güclü və proqnozlaşdırılması ən çətin komandalarından biridir. Uzun illər davam edən böyük turnir həsrətinə son qoyan "Bəbirlər", 2026-cı il dünya çempionatında (DÇ) Şimali Amerikanı bürüyən futbol fırtınasının ən rəngli və gözlənilməz kollektivlərindən biri olmağa namizəddirlər.
Qvadalaxarada 2026-cı il martın 31-də yarım əsrdən çox davam edən həsrət sona çatmışdı. DÇ-2026 pley-off turnirinin A yolunun finalında Yamayka komandasını əlavə vaxtda məğlub edən (1:0) Konqo DR 1974-cü ildən sonra yenidən qlobal turnirə qayıtmışdı.
Sedrik Bakambu, Şansel Mbemba və Artur Masuku kimi futbolçuların başçılıq etdikləri qızıl nəsli idarə edən baş məşqçi Sebastyen Desabre iddialı hədəflərinə nail olmağı bacarmışdı. İndi Konqo DR millisi K qrupunda Kolumbiya, Portuqaliya və Özbəkistan kimi güclü rəqiblərin gözlədiyi ciddi sınağa hazırlaşmağa başlayacaq.
Oxu.Az Konqo DR futbolunun keçmişinə, bu gününə və 2026-cı il gözləntilərinə nəzər salır.
2017-19-cu illərdə Uqanda ilə 18 ay işləyərək Afrika qitəsinin milli komandasına ikinci dəfə rəhbərlik edən Desabre indi dünya çempionatı həyəcanını yaşayacaq. Klub komandası "Şamua Niortais"i tərk edərək "Bəbirlər"in başına keçəndən dörd il sonra 49 yaşlı fransız mütəxəssis bütün Afrika qitəsində bayram edilən bir nailiyyətə imza atmışdı.
2022-ci ilin avqustunda Konqo DR-in baş məşqçisi təyin ediləndə mütəxəssis iddialı hədəflər müəyyənləşdirmişdi: "Hədəflərimiz 2025-ci ildə Afrika Millətlər Kubokuna vəsiqə qazanmaq və 2026-cı ildə Dünya Kubokunda iştirak etməkdir".
Vəzifədə olduğu ilk bir neçə ay ərzində azarkeşlər ehtiyatlı mövqe tutmuşdular, çünki keçmişdə dəfələrlə ümidləri boşa çıxmışdı. Lakin AFCON 2023-ə (2024-cü ilin əvvəlində keçirilən) vəsiqə qazanaraq Desabre tədricən azarkeş kütləsinin etibarını qazana bilmişdi. Turnir dönüş nöqtəsinə çevrilmiş və komandanın yarımfinala qədər yürüşü güclü bir komanda kimliyinin formalaşmasına kömək etmişdi.
Desabre oyun üslubunu "ES Kanne Roşvil", "Dubay CSC", "ES Tunis" və "Vidad AC" kimi klub komandalarına rəhbərlik edərkən formalaşdırmışdı. Dünya Kubokunda həmkarlarının əksəriyyətindən fərqli olaraq, Desabre heç vaxt peşəkar futbolçu olmayıb, lakin bu onun Afrikanın ən hörmətli məşqçilərindən birinə çevrilməsinə mane olmamışdı.
Konqo DR-in ilk dünya çempionatı
1997-ci ilə qədər ölkə Zair adı ilə tanınırdı və ilk dünya çempionatında məhz bu adla mübarizə aparmışdı. 1974-cü ildə futbol dünyası Qərbi Almaniyada bir araya gəlmişdi və Mərkəzi Afrika dövləti qitənin yeganə nümayəndəsi olmuşdu. Seçmə mərhələdə "Bəbirlər" Mərakeş və Zambiyanı keçərək Misir və Mərakeşin izindən gedən üçüncü Afrika ölkəsi kimi dünya çempionatında oynamaq hüququ qazanmışdılar.
Onlar II qrupda çətin oyunlarla elit səviyyəni ilk dəfə dadmışdılar. İlk matçda daha təcrübəli Şotlandiya komandasına uduzmışdular (0:2), sonra Yuqoslaviyadan ağır məğlubiyyət almışdılar (0:9). Bir çoxu onların ovaxtkı çempion Braziliya qarşısında oxşar aqibətlə üzləşəcəyini gözləsə də, afrikalılar cəsarətli oyun nümayiş etdirərək Jairzinya və yoldaşlarına 0:3 hesabı ilə uduzmuşdular.
Dünya çempionatı debütlərində bir qol belə vura bilməmələri o deməkdir ki, Bakambu, Yoan Vissa və digərləri bu dəfə ölkənin ilk dünya çempionatı qolçusu olaraq adlarını tarix kitablarına yazdırmaq şansına sahibdirlər.
Konqo DR DÇ-2026-ya vəsiqəni necə qazanıb?
DÇ-2018 və DÇ-2022-yə az qala vəsiqə qazanmaq üzrə olan "Bəbirlər" inkişaf etməyə davam etmiş və səyləri, nəhayət, DÇ-2026-ya vəsiqə ilə mükafatlandırılmışdı.
B qrupuna düşən Konqo DR Seneqalı qabaqlayaraq birinci yeri və avtomatik vəsiqəni qazanmağa az qalmışdı. Lakin Kinşasadakı həlledici matçda 2:0 hesabı ilə öndə olmalarına baxmayaraq, Bakambu və komanda yoldaşları sonda 2:3 hesabı ilə məğlub olmuşdular.
CAF zonasının ən yaxşı dörd ikinci yerdən biri kimi Desabrenin komandası Afrika pley-offuna yüksəlmişdi. Yarımfinalda Mbemba Kamerun qarşısında matçın sonunda vurduğu qolla (1:0) konqoluları sevincə qərq etmişdi. Sonra Nigeriya ilə finalda Konqo DR gərgin penalti seriyasında soyuqqanlılığını qoruyaraq qələbə qazanmışdı (1:1 ə.v., penaltilər 4:3).
Bu nəticə onlara Meksikadakı pley-off turnirinə vəsiqə qazandırmış və burada böyük əzmkarlıq nümayiş etdirərək Yamayka üzərində (1:0 ə.v.) qələbə qazanmışdılar.
DÇ-2026-da Konqo DR-nın oyun cədvəli (Bakı vaxtı ilə)
Konqo DR DÇ-2026-da K qrupunda Portuqaliya, Kolumbiya və Özbəkistan millilərinə qarşı mübarizə aparacaq.
K qrupu:
17 iyun, 21:00, Portuqaliya - Konqo DR (Hyuston stadionu);
24 iyun, 06:00, Kolumbiya - Konqo DR (Qvadalaxara stadionu);
28 iyun, 03:30, Konqo DR - Özbəkistan (Atlanta stadionu).
Konqo DR-in dünya çempionatlarında ən çox oyun keçirən futbolçuları
Qərbi Almaniyada (1974) keçirilən DÇ-də "Bəbirlər"in 18 futbolçusu qrup mərhələsi matçlarında meydana çıxıb və onlardan onu hər üç oyunda iştirak edib: Lobilo Boba, Muepu İlunqa, Kembo Uba Kembo, Mayanqa Maku, Mana Mambuene, Kidumu Mantantu, Kilasu Massamba, Kazadi Muamba, Mvanza Nel Mukombo və Buanqa Tşimen.
Konqo DR millisi Şimali Amerikaya sadəcə turizm məqsədilə getmir. Onlar sahib olduqları inanılmaz fiziki güc və Vissanın qolları ilə qrupdan çıxaraq turnirin əsas sürprizlərindən birinə imza atmaq niyyətindədirlər. "Bəbirlər" bu çətin qrupda Portuqaliya və Kolumbiya kimi nəhənglərdən xal qoparmağı bacaracaqlar?
