"IRONMAN triatlon yarışının ilk dəfə Bakıda keçirilməsi Azərbaycan üçün əlamətdar hadisədir. Bu günü uzun müddətdir gözləyirdik və nəhayət, yarışa start verildi".
Oxu.Az xəbər verir ki, bunu gənclər və idman naziri Fərid Qayıbov Bakıda təşkil olunan "IRONMAN 70.3" triatlon yarışı ilə bağlı jurnalistlərə açıqlamasında deyib.
Onun sözlərinə görə, 2026-cı ildə Bakının dünyanın idman paytaxtı olması şəhərdə keçirilən beynəlxalq yarışların sayının artmasına şərait yaradıb.
"Bu yarışda dünyanın 60-dan çox ölkəsindən idmançılar iştirak edirlər. 1000-dən artıq atletin qatıldığı turnirdə Azərbaycanı 100-dən çox idmançı təmsil edir. Yerli iştirakçıların sayının çox olması bizi xüsusilə sevindirir.
Son illərdə triatlona maraq Azərbaycanda nəzərəçarpacaq dərəcədə artıb. IRONMAN yarışlarında iştirak edən idmançılarımızın sayı da ildən-ilə çoxalır. Bakıda keçirilən bu yarış atletlərimiz üçün özlərini sınamaq və IRONMAN statusu əldə etmək baxımından yaxşı fürsətdir.
Bu münasibətlə bütün iştirakçıları, federasiyanı təbrik edir, yarışın təşkilində əməyi olan tərəfdaşlarımıza təşəkkür edirəm. Ümid edirəm ki, gələcəkdə də ölkəmiz belə mötəbər idman tədbirlərinə ev sahibliyi edəcək.
Nazirliyin qarşıya qoyduğu əsas hədəflərdən biri idmanın insanların gündəlik həyatının bir hissəsinə çevrilməsidir. Belə beynəlxalq yarışların Azərbaycanda təşkili də bu istiqamətdə atılan mühüm addımlardandır", - deyə Fərid Qayıbov bildirib.
Qeyd edək ki, Bakıda keçirilən "IRONMAN 70.3" triatlon yarışında Azərbaycan 123 idmançı ilə təmsil olunur. İştirakçılar kişilər və qadınlar arasında 13 yaş qrupunda mübarizə aparırlar. Kateqoriyalar 18-24 yaşdan başlayaraq 80-84 yaşadək olan idmançıları əhatə edir.
