Boliviyanın Vyaça şəhərində yerləşən hərbi texnikaya xidmət mərkəzinin ərazisində qeydə alınan partlayış nəticəsində azı iki nəfər həyatını itirib, 59 nəfər isə xəsarət alıb.
Oxu.Az xəbər verir ki, bu barədə hüquq-mühafizə orqanlarına istinadən "Unitel" telekanalı məlumat yayıb.
"İki nəfər həlak olub, yeddi nəfər itkin düşmüş hesab edilir, 59 nəfər isə müxtəlif dərəcəli bədən xəsarətləri alıb", - deyə telekanal öz saytında polis komandanının müavini Rocer Rokenin sözlərindən sitat gətirib.
Boliviyanın müdafiə naziri Ernesto Xustinianonun verdiyi məlumata əsasən, zərərçəkənlərdən altısı hərbi qulluqçu, qalanları isə mülki vətəndaşlardır. Hadisə ərazisində xilasedicilərin axtarış-xilasetmə tədbirləri davam edir. Müdafiə idarəsinin rəhbəri əlavə edib ki, hadisə "pirotexniki materiallar"ın saxlanıldığı bölmədə baş verib. Güclü partlayış dalğası səbəbindən yaxınlıqdakı yaşayış evlərinə ziyan dəyib.
