"UFC döyüşləri Azərbaycanda keçirilir və bu, Azərbaycan üçün çox böyük bir hadisədir".
Oxu.Az xəbər verir ki, bunu Bakıda keçiriləcək Mütləq Döyüş Çempionatı (UFC) turnirinin ulduz qonağı, superyüngül çəki dərəcəsində UFC çempionu, gürcü döyüşçü Merab Dvalişvili brifinqdə deyib.
M.Dvalişvili bildirib ki, UFC döyüşlərinin vətənində də keçirilməsini çox istəyir:
"Mən özüm gürcüstanlıyam, çox istərdim ki, UFC Gürcüstanda da keçirilsin, amma bu, çətin bir məsələdir. Siz çox şanslısınız. Bütün azərbaycanlı döyüşçülərə qarşıdakı turnirdə uğurlar arzulayıram".
Qeyd edək ki, "UFC Fight Night" iyunun 21-də "Baku Crystall Hall"da baş tutacaq. Gecənin əsas qarşılaşması keçmiş UFC yarımağır çəki çempionu Camal Hill ilə keçmiş titul iddiaçısı Xalil Rauntri arasında olacaq. Həmin gecənin ikinci ən vacib döyüşü isə həmyerlimiz Rafael Fiziyev ilə Çili təmsilçisi İqnasio Baxamondes arasında yüngül çəkidə keçiriləcək.
Turnir çərçivəsində, həmçinin Azərbaycan təmsilçiləri Nazim Sadıxov və Tofiq Musayev də oktaqona çıxacaqlar. Onların rəqibləri isə müvafiq olaraq braziliyalı Nikolas Motta və qırğızıstanlı Mıqtıbek Orolbay olacaq.
Təhməz Əsədov
