"İlk oyunlarda diqqətli olmalıyıq. Bəzi futbolçuların hazırlığını nəzərə almalıyıq, bəzi rotasiyalar etməliyik".
Oxu.Az xəbər verir ki, bunu UEFA Avropa Liqasının 1-ci təsnifat mərhələsində keçirilən "Qarabağ" - "Vestri" oyunundan sonra təmsilçimizin baş məşqçisi Qurban Qurbanov deyib.
O bildirib ki, cavab oyununda rotasiyalar olacaq:
"Beş hazırlıq günümüz olacaq, futbolçuların hazırlıq durumuna baxacağıq. Gənc futbolçumuz Əli Bəşirova gəldikdə, hazırlığın ilk günündən bizimlədir. Maksimum şərait yaradacağıq ki, kollektivin içində tam olsun. İmkan olduqca, oynamağa şərait yaradacağıq. Qabiliyyətli, istedadlı oyunçudur. İndidən bu atmosferə uyğunlaşdırmağa çalışacağıq. Oynamasa belə, kollektivin içində olması, məsuliyyəti hiss etməsi, tapşırıqları görməsi onun üçün təcrübə olacaq. Futbolçu kimi inkişafına etməsinə kömək olacağıq. Hər bir gənc üçün maksimum şərait yaradırıq.
Onun üçün ən yaxşısını etməyə çalışacağıq. Onun gələcəyi üçün faydalı təklif olarsa, yaxşı komandadan gələrsə, klub kimi mane olmayacağıq. Bəlkə də burada qalmağı xeyirli olacaq. Hər bir hada gəncdir. Onun gələcəyi üçün ən yaxşısı nədirsə, onu edəcəyik".
Qeyd edək ki, UEFA Avropa Liqasının 1-ci təsnifat mərhələsində keçirilən "Qarabağ" - "Vestri" (İslandiya) oyunu təmsilçimizin 3:0 hesablı qələbəsi ilə başa çatıb.
Xatırladaq ki, cavab qarşılaşması İslandiyanın paytaxtı Reykyavikdə yerləşən "Valbyarnarvöllur" stadionunda olacaq. Görüş Bakı vaxtı ilə iyulun 17-də, saat 00:00-da start götürəcək.
