Türkiyə Superliqası: "Beşiktaş" - "Fənərbağça" derbisinin taleyini bir qol həll etdi

Türkiyə Superliqasında 15-ci turun mərkəzi qarşılaşması oynanılıb.

Oxu.Az xəbər verir ki, İstanbul derbisində "Beşiktaş" öz meydanında "Fənərbağça" ilə üz-üzə gəlib.

Matçın taleyini bir qol həll edib. Çemberlenin 73-cü dəqiqədəki dəqiq zərbəsi ev sahiblərinə qələbə qazandırıb - 1:0.

Hazırda "Beşiktaş" 25 xalla turnir cədvəlində 4-cü, "Fənər" isə 32 xalla 2-cidir. Yarışa onlardan bir oyun az keçirən, lakin 35 xala malik "Qalatasaray" başçılıq edir.

11:47

Türkiyə Superliqasının ən həyəcanlı oyunu olan "Beşiktaş" - "Fənərbağça" derbisi bu gün oynanılacaq.

Oxu.Az-ın məlumatına görə, "Beşiktaş" və "Fənərbağça" Superliqada 137-ci dəfə qarşı-qarşıya gələcək. Bu günə qədər oynanılan 136 oyunda "Fənərbağça" 49, "Beşiktaş" isə 42 qələbə qazanıb. 45 qarşılaşma isə heç-heçə başa çatıb.

Son 12 derbi olduqca maraqlı statistikaya malikdir: altısı heç-heçə bitib, komandaların hər biri üç qələbə qazanıb. Lakin "Fənərbağça" son illərdə "Beşiktaş"a qarşı üstünlük qurub və ötən mövsüm oynanılan iki derbini də qazanıb. Buna görə də "Beşiktaş" üçün bu derbi həm prestij, həm də əhvali-ruhiyyə baxımından böyük əhəmiyyət daşıyır.

Derbiyə Mehmet Türkmen hakimlik edəcək, köməkçiləri isə Caner Özaral və Candaş Elbil olacaqlar.

"Beşiktaş" - "Fənərbağça" derbisi Türkiyə vaxtı ilə 19:00-da (Bakı vaxtı ilə 20:00) "Tüpraş" stadionunda (Dolmabahçe) keçiriləcək. Oyun "beIN SPORTS 1 HD"də yayımlanacaq.

"Beşiktaş"ın ehtimal olunan 11-liyi:

Mert Günok, Yunas Svensson, Tayyip Talha, Emirhan Arkutcu, Artur Masuaku, Moatasem Al-Musrati, Rafa Silva, Jedson Fernandeş, Milot Raşitsa, Semih Kılıçsoy, Çiro Immobile.

"Fənərbağça"nın ehtimal olunan 11-liyi:

Dominik Livakoviç, Oseyi-Semuel, Rodriqo Bekan, Aleksander Ciku, Filip Kostic, Fred (Frederiko Rodriges), Duşan Tadic, Sofyan Amrabat, Oğuz Aydın, Sen-Maksimen, Edin Ceko.