Yerli mediada yayılan xəbərlərə görə Azər Bağırovla yolları ayıran "Kəpəz" klubu baş məşqçi postuna Vaqif Cavadovu gətirmək istəyir. Hətta əmisi İsgəndər Cavadov və qohumu İlqar Qurbanovla yanaşı klubun idman məsələləri üzrə müşaviri Erkin İbrahimov da bu keçidin baş verməsini istəyir. Belə ki, tərəflər arasında ilkin danışıq da olub.
Bu barədə Oxu.Az-a açıqlama verən Vaqif Cavadov xəbərləri təkzib edib.
"Hazırda "Sumqayıt" klubunun strukturunda çalışıram və bu xəbərlər həqiqəti əks etdirmir. Hətta mənə "Kəpəz" klubundan təklif belə gəlməyib", - deyə Vaqif Cavadov bildirib.
Mövzu ilə əlaqədar olaraq "Kəpəz" klubunun da fikrini öyrəndik.
Məsələ ilə bağlı Oxu.Az-a açıqlama verən "Kəpəz" klubunun Media və marketinq departamentinin direktoru Gəray Qiyasov isə bildirib ki, baş məşqçi postuna yerli mütəxəssis gətirmək istəsələr də, konkret ad yoxdur.
"Kəpəz" klubunda baş məşqçi postu üçün namizədlər yerli mütəxəssislər olsalar da, konkret ad hələ yoxdur. Baş məşqçi postuna gətiriləcək şəxs klub tərəfindən rəsmi olaraq açıqlanacaq", - deyə G.Qiyasov bildirib.
Qeyd edək ki, Vaqif Cavadov 2024/25 mövsümündə "Sumqayıt"ın baş məşqçisi olaraq çalışıb.
Anar Həsənov
