Vaqif Cavadov "Sumqayıt"dan ayrılır?

Samir Abasovun "Neftçi" klubuna keçidindən sonra "Sumqayıt"ın müvəqqəti baş məşqçisi postuna keçən Vaqif Cavadovun klubdakı gələcəyi hələ də bəlli deyil.

Bu barədə Oxu.Az-a açıqlamasında "Sumqayıt" klubunun mətbuat katibi Zaur Xudiyev bildirib ki, baş məşqçi ilə bağlı yekun qərar yaxın vaxtlarda veriləcək.

"Klub olaraq bildirmək istəyirik ki, hazırda baş məşqçi məsələsi ilə bağlı hansısa yeni qərar yoxdur. Yeni qərar olacağı təqdirdə rəsmi açıqlama verəcəyik", - deyə Z.Xudiyev bildirib.

Qeyd edək ki, "Sumqayıt" klubu Vaqif Cavadovun başçılığı altında 13 xal toplayıb.

Belə ki, "Sumqayıt" doqquz görüşün dördündə qələbə qazanıb, bir dəfə isə heç-heçə edib. Komanda dörd dəfə məğlubiyyətlə barışmalı olub.

Anar Həsənov