Qan Turalı yazır...
"ChatGPT" həyatımızda mühüm bir yer tutur. Hətta o dərəcədə önəmlidir ki, artıq insanlara ağsaqqallıq, bəzən mentorluq edir. Psixoloji məsləhətlərdən tutmuş, maliyyə planlaşdırmasına qədər insanlar hər şeydə "ChatGPT" ilə məsləhətləşərək qərar verirlər.
Dünən açıqlanan yeniliyə görə isə "ChatGPT"də erotik məzmunlar yaratmaq da mümkün olacaq. Bu yeniliyə nə ehtiyac var idi? Doğrudur, şirkət bu cür məzmunların yaş senzinə bağlı olduğunu iddia edir. Ancaq yaş məhdudiyyətini aşmağa nə var ki? Yeniyetmələrin əlində bu bir saniyəlik işdir.
Ümumilikdə isə, təkcə "ChatGPT"yə yox ümumilikdə sosial şəbəkələrə yaş senzinin qoyulması ən çox müzakirə edilən mövzulardan biridir. Fikrin tərəfdarları öz mövqelərini belə müdafiə edir: Madam ki, yaşı 18-ə çatmamış şəxslərə siqaret, spirtli içki satılmır, ya da onların səsvermə hüququ yoxdur, bu məhdudiyyət sosial şəbəkə üzvü olmağa da aid edilməlidir. Məntiqli görünür ancaq belə bir mexanizmin işlək olmasına böyük şübhələr də var.
"ChatGPT"də yeniliklər də var. Misal üçün, mesajlaşma xidməti. Göründüyü kimi "ChatGPT" də sosial şəbəkə olmağa doğru gedir. Bu yeniliklərin məqsədinin istifadəçi sayının artırmaq olduğu bildirilir. İstifadəçi sayı artırsa deməli, keyfiyyətdə güzəştə getmək vacibdir.
İlon Maskın süni intellekti olan "Grok" erotik məzmunlara yer verməsi ilə bu sahədə pioner olmuşdu. İndi isə "ChatGPT" bu yolu davam etdirir.
Bəşər övladının isə hər şeyi məhv etmək xasiyyəti var. Ya da belə demək daha nəzakətli görünür: Heç bir kəşf əzəli məqsədinə xidmət etmir. Yeni dövrün nəhəng texnoloji kəşfləri bəşərin rifahının artmasında yox, silah sənayesinin yüksəlişində istifadə edildi, iki dünya müharibəsi oldu və bu müharibələrdə on milyonlarca adam öldü. Bu faktın özü belə dediklərimizi sübut etməyə kifayət edir.
Ya da internetin kəşfini götürək. İnternetin yeni kəşf edildiyi zamanlarda də sosioloqlar, filosoflar, futuroloqlar düşünürdülər ki, internetin kəşfi ilə informasiya cəmiyyəti qurulacaq, informasiyalar daha sürətli dövr edə biləcək, azad fikrin, sağlam şüurun çata bilmədiyi diyarlar çiçəklənəcək, hər yer gülüstana çevriləcək.
Bütün bunların bu cür olmadığı zamanla üzə çıxdı. Hazırda biz sosial media zibilliyində yaşayırıq. Hər bir zibillik kimi burada da yaxşı axtarsaq faydalı şeylər tapa bilərik. Ancaq bu, onun zibillik mahiyyətini əsla dəyişdirmir.
"ChatGPT" ilk dəfə ortaya çıxanda da nə ümidlər vardı, nə xəyallar vardı. İşlərimizi ona gördürəcəyik, beşgünlük işi beş dəqiqəyə görəcəyik. Qalan vaxtda isə elmlə, fəlsəfə ilə, incəsənətlə məşğul olacağıq. İndi isə "ChatPT" erotik məzmun yaratmağa imkan verir. Əzəli məqsədinə qətiyyən uyğun gəlməyən bir yanaşmadır, özgələşmədir.
"ChatGPT"nin xeyli faydaları da var, bunu inkar etmək olmaz. Ancaq kütləvi istifadə belədirmi? Şirkət isə süni intellekti gücləndirmək, yalan xəbərlərlə mübarizə aparmaq əvəzinə istifadəçi sayını artırmağa çalışır. "ChatGPT" ilə fala baxan kim, ulduz bürcü oxuyan kim. Tərəzi və Dolça bürcünün münasibətləri tutarmı? Bunu soruşanlar da var. Ya da, yuxusunu "ChatGPT"yə danışıb ondan bu yuxunun yozulmasını istəyənlər də az deyil. Bəs "ChatGPT" bu suallar qarşısında nə edir? Yüz ilin yuxu yozanı kimi məsləhət verir.
İndi isə erotik məzmunlar yaradacaq. Bəs sabah nə olacaq? Problem buradadır.
