"Ayrı-ayrı dövlət qurumlarının fərdi rəqəmsal portallarının və mobil tətbiqlərinin mərhələli şəkildə vahid ekosistemə inteqrasiya edilməsi, ölkənin yeni rəqəmsal arxitekturasının formalaşdırılmasında Rəqəmsal İnkişaf Şurasının icra edəcəyi ən kritik və fundamental islahatlardan biridir".
Bu sözləri Oxu.Az-a açıqlamasında "Azərbaycan İnformasiya və Kommunikasiya Texnologiyaları Sənayesi Assosiasiyası" İctimai Birliyinin sədri, İKT üzrə ekspert Elvin Abbasov deyib.
O bildirib ki, hazırda vətəndaşların və biznes subyektlərinin fərqli dövlət xidmətlərini əldə etmək üçün çoxsaylı dağınıq platformalarda ayrı-ayrılıqda qeydiyyatdan keçməsi, həm istifadəçi təcrübəsini mürəkkəbləşdirir, həm də hər bir qurumun fərdi rəqəmsal infrastruktur saxlaması səbəbindən dövlət büdcəsinə əlavə maliyyə yükü yaradır:
"Şuranın rəhbərliyi altında həyata keçiriləcək mərhələli inteqrasiya prosesi bu rəqəmsal izolyasiyanı aradan qaldıraraq bütün xidmətlərin vahid təhlükəsizlik perimetri və universal istifadəçi kabineti daxilində birləşdirilməsini təmin edəcək".
"Bu mərkəzləşdirilmiş ekosistemin qurulması, rəqəmsal dövlət idarəçiliyində məlumatların təkrarlanmasının qarşısını alacaq və Milli Məlumat Hövzəsi ilə "hökumət buludu" (G-cloud) infrastrukturu üzərindən qurumlararası real vaxt rejimində data mübadiləsini optimallaşdıracaq. Vətəndaşlar üçün rəqəmsal xidmətə çıxışı tək bir pəncərəyə endirən bu addım, bürokratik prosesləri minimuma endirməklə yanaşı, kibertəhlükəsizlik menecmentini də vahid mərkəzdən idarə olunan daha dayanıqlı struktura çevirəcək. Nəticə etibarilə, Şuranın fəaliyyət proqramında yer alan bu strateji hədəf, dövlət-vətəndaş münasibətlərində şəffaflığı maksimallaşdıracaq və Azərbaycanın beynəlxalq elektron hökumət reytinqlərindəki mövqeyini rəqabətədavamlılıq baxımından tamamilə yeni və keyfiyyətli bir mərhələyə yüksəldəcək", - deyə ekspert vurğulayıb.
