ABŞ tariflərdən qurtulmaq istəyən ölkələrə bir sıra şərtlər irəli sürəcək

ABŞ onunla ticarət müqaviləsi bağlamaq və gömrük rüsumlarından qurtulmaq istəyən ölkələrə bir sıra şərtlər irəli sürmək niyyətindədir.

Oxu.Az xəbər verir ki, bu barədə "Washington Post" (WP) məlumat verib.

Qeyd olunur ki, Vaşinqton xarici tərəfdaşlardan ABŞ qazının alışını artırmağı tələb etmək istəyir. Həmçinin ABŞ-nin məhsullarının daha aşağı tariflərlə digər ölkələrə ixrac etməyə və xaricdə fəaliyyət göstərən texnologiya nəhəngləri üçün vergilərin azaltmağa çalışacağı gözlənilir.

"Bunlar Tramp administrasiyasının son dərəcə yüksək tariflərdən qurtulmağa çalışan onlarla ölkə ilə danışıqlarda irəli sürəcəyi tələblərdən yalnız bir neçəsidir", - deyə məqalədə vurğulanır.

Eyni zamanda, nəşrin danışıqlar prosesində iştirak edən mənbələri etiraf ediblər ki, Ağ Ev hələlik konkret tələblər siyahısını tərtib etməyib. Bununla belə, ümumi mənzərə artıq üzə çıxmağa başlayıb.

Xatırladaq ki, aprelin 2-də Vaşinqton ölkəyə idxal olunan bütün məhsullar üzrə baza dərəcəsi 10% təşkil edən yeni gömrük rüsumları sistemi tətbiq edib. Bir sıra ölkələr üçün bu rəqəm xeyli yüksək olub.