2025-ci ilin 9 ayında inflyasiya proqnozlaşdırılan trayektoriya üzrə hərəkət edib. Azərbaycan Mərkəzi Bankının (AMB) məlumatına görə, sentyabr ayında illik inflyasiya hədəf diapazonu olan 4±2% aralığında olub.
Oxu.Az xəbər verir ki, bu barədə AMB məlumat yayıb.
Məlumatda bildirilir ki, istehlak qiymətləri indeksi 2025-ci ilin sentyabrında məhsul və xidmətlər üzrə illik 5.7% təşkil edib. Qiymətləri dövlət tərəfindən tənzimlənən və mövsümi təsirə məruz qalan məhsullar istisna olmaqla hesablanan baza inflyasiya isə 4.9% olub.
Son bir ildə ümumi inflyasiyanın əsas mənbəyi ərzaq qiymətləri olub. Sentyabr ayında qida məhsulları, alkoqollu içkilər və tütün məmulatları üzrə illik inflyasiya 7.9% təşkil edib. Ötən ilin eyni dövründə bu göstərici 1.2% olub. Ərzaq qrupunda ən yüksək qiymət artımı tərəvəz məhsulları (13%) və kərə-bitki yağlarında (12.5%) qeydə alınıb.
Qeyri-qida məhsullarının qiymətləri illik 2.4% artıb. Bu qrupda ən çox bahalaşma 21.2% göstərici ilə zərgərlik məmulatlarında müşahidə olunub.
Xidmətlər sektorunda illik inflyasiya 5.3% təşkil edib. Əhaliyə göstərilən ödənişli xidmətlər arasında mərkəzi isitmə (2 dəfə), təbii qaz təchizatı (11.8%), icarə haqqı (8.4%) və telefon rabitəsi (4.7%) üzrə qiymət artımı daha çox olub.
Dövlət Statistika Komitəsinin (DSK) məlumatına görə, sentyabr ayında kənd təsərrüfatı məhsullarının istehsalçı qiymətləri illik 9.3% artıb. Bitkiçilik məhsullarında artım 8.9%, heyvandarlıq məhsullarında isə 9.6% təşkil edib.
Sənaye məhsullarının istehsalçı qiymətləri indeksi isə illik 4.5% azalıb. Neft-qaz sənayesi məhsullarında bu azalma 7%, qeyri-neft-qaz sənayesində isə artım 3.6% olub. Emal sənayesi üzrə qiymət indeksi 3.1% artıb.
Eyni zamanda, nəqliyyat və anbar təsərrüfatı xidmətlərində istehsalçı qiymətləri 2%, yükdaşıma xidmətlərində 3.2%, proqram təminatı xidmətlərində isə 4.9% artım göstərib.
Mənzil bazarında qiymətlər də yüksəlib. 2025-ci ilin III rübündə mənzil qiymətləri ötən ilin eyni dövrü ilə müqayisədə 10.8% artıb. İlkin mənzil bazarında artım 11.7%, təkrar bazarda isə 10.8% olub. Ümumilikdə, ilin 9 ayı ərzində mənzil qiymət indeksi 12.7%, ilkin bazarda 12.5%, təkrar bazarda 12.8% artım nümayiş etdirib.
Hesabat dövründə qlobal inflyasiya göstəriciləri ölkələr üzrə fərqli olub. ABŞ-də illik inflyasiya 3% səviyyəsində qalıb. Avrozonada sentyabrda inflyasiya 2.2%-ə yüksəlib, yarım ildə bu göstərici 2.5%-dən 2%-ə enmişdi. Çin-də illik inflyasiya mənfi zonada olub (- 0.3%), bunun əsas səbəbi ərzaq qiymətlərinin 4.4% azalmasıdır. Rusiya-da illik inflyasiya 8% təşkil edib. Bu, son 17 ayın ən aşağı göstəricisidir, lakin hədəf olan 4%-dən hələ də yüksəkdir. Ərzaq inflyasiyası 9.5%, baza inflyasiya isə 7.7% olub.
Türkiyədə sentyabr ayında illik inflyasiya 33.29%-ə çatıb. Aylıq artım 3.23% olub. Ərzaq və alkoqolsuz içkilərdə qiymətlər 36.06%, yaşayış-kommunalda 51.36%, təhsildə 66.10%, nəqliyyatda isə 25.30% artıb. Qazaxıstanda illik inflyasiya 12.9%, aylıq inflyasiya isə 1.1% olub. Gürcüstanda illik inflyasiya 4.8%, aylıq 0.5%, baza inflyasiya isə 2.4% təşkil edib.
