"Bakının Baş planı çərçivəsində adambaşına düşən ictimai yaşıllıq sahəsinin 5.8 kvadratmetrdən 8 kvadratmetrədək artırılması gözlənilir. 2040-cı ilədək ictimai yaşıllıq sahələrinin ümumi ərazisinin təxminən 2 500 hektara çatdırılması və əlavə olaraq 1 000 hektara yaxın yeni yaşıl ərazinin yaradılması hədəflənir".
Oxu.Az xəbər verir ki, bu fikirləri Dövlət Şəhərsalma və Arxitektura Komitəsinin sədri və WUF13 üzrə milli koordinator Anar Quliyev Bakı İqlim Fəaliyyəti Həftəsi çərçivəsində keçirilən "COP29-dan İqlim Həftəsinə: Yaşıl dünya üçün rəqəmsal fəaliyyət yolu" adlı sessiyada çıxışı zamanı deyib.
O bildirib ki, məqsəd yalnız yaşıllıq sahələrinin artırılması deyil:
"Hiper-yaşıl dəhlizlərin yaradılması vasitəsilə iqlim dəyişikliklərinə uyğunlaşmanın, biomüxtəlifliyin qorunmasının, ictimai sağlamlığın və dayanıqlı mobilliyin dəstəklənməsi nəzərdə tutulur".
O əlavə edib ki, Azərbaycan 2035-ci ilədək istixana qazı emissiyalarını 1990-cı il səviyyəsi ilə müqayisədə 40% azaltmaq öhdəliyi götürüb.
