Mayın 24-də İsrail-Azərbaycan Ticarət və Sənaye Palatasının prezidenti Aleks Kaplunun başçılıq etdiyi nümayəndə heyəti ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin nümayəndə heyəti arasında görüş keçirilib.
Agentliyin İctimaiyyətlə əlaqələr şöbəsindən verilən xəbərə görə, qonaqlara “ASAN xidmət”in yaradılması məqsədi və fəaliyyət istiqamətləri barədə ətraflı məlumat verilib. Qeyd olunub ki, şəffaflığın artırılması və müasir innovasiyaların tətbiqi baxımından “ASAN xidmət”in yaradılması ilə səmərəli dövlət idarəçiliyinin təmin edilməsi sahəsində ciddi nailiyyətlər əldə olunub.
Bildirilib ki, bu günədək 44 milyona yaxın vətəndaş müraciəti qeydə alınıb. “ASAN xidmət”in 2015-ci ildə Birləşmiş Millətlər Təşkilatının Dövlət Xidmətləri Mükafatına, 2019-cu ildə isə BMT-nin rəqəmsal idarəetmənin tətbiqi ilə dövlət xidmətlərinin inkişafı sahəsində xüsusi mükafatına layiq görülməsi qonaqların diqqətinə çatdırılıb.
Görüşdə iki ölkə arasındakı əməkdaşlıq, həmçinin tərəflər arasında perspektivlər müzakirə olunub. Həmçinin “YAŞAT” Fondu çərçivəsində qazilərimizə israilli informasiya texnologiya mütəxəssisləri tərəfindən müvafiq kursların tədrisi, onları gələcək əmək bazarında müvafiq biliklərə yiyələndirərək rəqabətqabiliyyətli potensialın inkişaf etdirilməsi təklifləri də vurğulanıb.
Yaradılmış şərait və iş prinsipi ilə tanış olan qonaqlar Dövlət Agentliyinə və tabeliyində fəaliyyət göstərən qurumlara gələcək fəaliyyətində uğurlar arzulayıblar.
