"İqlimədavamlı bir dünya qurmaq üçün bütün insanlıq birləşməlidir".
Oxu.Az xəbər verir ki, bunu Böyük Britaniyada "Sustainable Cities Global Ltd"nin təsisçisi və prezidenti Saida Əhməd II Azərbaycan Halal Biznes (AZHAB) Forumunda "Qlobal yaşıl keçid diskursunda KOB-ların rolunun artırılması: Bakı İqlim Koalisiyasının KOB-ların yaşıl keçidinə dair Birgə Bəyannaməsi" mövzusunda aparılan panel müzakirəsində deyib.
O bildirib ki, hazırda bir çox KOB-lar, xüsusilə halal iqtisadiyyatdakı şirkətlər bu sahədə necə irəliləməli olduqlarını bilmirlər:
''Onlara "et" deyilir, amma necə etməli olduqları izah edilmir. Buna görə biz onlara istiqamət göstərməli, mərhələli şəkildə dəstək olmalıyıq".
Saida Əhmədin sözlərinə görə, islam və halal iqtisadiyyat istismar modelinə əsaslanmır:
"O, mənfəətin optimallaşdırılması, yəni həm iqtisadi, həm sosial, həm də ekoloji balansın qorunması fəlsəfəsinə söykənir.
Sən pul qazanmaq naminə ətraf mühiti, insanları - qadınları, uşaqları, həssas təbəqələri, kiçik və orta sahibkarları - zərbə altına atmamalısan. Yeri, onun üzərində və altında yaşayan canlıları məhv etməməlisən. Əks halda, gələcək üçün problem yaradırsan.
Ancaq bir əsas çətinlik var: məsələn, Avropa İttifaqının "Green Deal" (Yaşıl razılaşma) siyasəti və iqlim dəyişikliklərinə qarşı tədbirləri bəzən öhdəliklərini yerinə yetirməyən biznesləri cərimələyir.
Nəticədə halal iqtisadiyyatda fəaliyyət göstərən və ya Avropaya ixrac edən şirkətlər karbon vergisi ödəməli olurlar. Bu da onların məhsullarını bahalaşdırır və Avropa bazarında rəqabətqabiliyyətini azaldır.
Bu məqamda əsas sual yaranır: iqlim məsuliyyətli olmaq iqtisadi yükdürmü, yoxsa fürsət? Əgər düzgün yanaşsaq, bu təkcə ətraf mühit üçün deyil, həm də bizneslərin gəlirliliyini artıran fürsət ola bilər".
O vurğulayıb ki, dayanıqlı şəhərlər KOB-larsız (kiçik və orta bizneslərsiz) mövcud ola bilməz:
"Eyni zamanda, o KOB-lar da iqlim və sosial məsuliyyət prinsiplərinə daxil edilmədən bu sistem işləməz. Bu, bütün dünyada həyata keçirməli olduğumuz yanaşmadır: biznesləri iqlim məsuliyyətinə görə cəzalandırmaq yox, əksinə, bu məsuliyyət sayəsində onları daha rahat və gəlirli fəaliyyət göstərməyə təşviq etmək lazımdır".
Aygün Mirakif
