"KOB-lar ÜDM artımı və iş yerlərinin yaradılmasında mühüm rol oynayırlar".
Oxu.Az xəbər verir ki, bunu Asiya İnkişaf Bankının (Filippin) Azərbaycan üzrə ölkə direktoru Sunniya Durrani-Jamal II Azərbaycan Halal Biznes (AZHAB) Forumunda "Qlobal yaşıl keçid diskursunda KOB-ların rolunun artırılması: Bakı İqlim Koalisiyasının KOB-ların yaşıl keçidinə dair Birgə Bəyannaməsi" mövzusunda aparılan panel müzakirəsində deyib.
O bildirib ki, dünyada bütün bizneslərin 90%-ni KOB-lar təşkil edir:
"Asiya və Mərkəzi Asiyanın inkişaf etməkdə olan regionlarında isə, mikro müəssisələr də daxil edildikdə, bu göstərici, təxminən, 98%-ə çatır.
Eyni zamanda, KOB-ların qlobal istixana qazı emissiyalarının, təxminən, 40%-nə səbəb olduğu hesab edilir. Bu da onu göstərir ki, KOB-lar və mikromüəssisələr yalnız iqtisadiyyatın mərkəzində deyil, həm də ətraf mühitin qorunmasında əsas oyunçulardır.
Deməli, onların aktiv iştirakı uğurlu və ədalətli yaşıl keçidin ayrılmaz hissəsidir".
Sunniya Durrani-Jamalın sözlərinə görə, tədqiqatlar göstərir ki, yaşıl fəaliyyət yalnız ekologiyanı qorumaq demək deyil, bu həm də uzunmüddətli rəqabət qabiliyyətini artırmaq deməkdir:
"Enerji səmərəliliyini yüksəltməklə və davamlı təcrübələr tətbiq etməklə KOB-lar əməliyyat xərclərini azalda, həm də yeni bazarlara çıxış imkanlarını genişləndirə bilərlər".
O bir sıra çətinliklərdən bəhs edib:
"Amma təbii ki, bir çox çətinliklər də var. Dünyanın hər yerində KOB-lar təchizat zəncirlərinin pozulması, iqlim dəyişikliyi ilə bağlı risklər, maliyyə resurslarının məhdudluğu, karbon-intensiv sahələrdə yüksək əməliyyat xərcləri, yaşıl maliyyəyə çıxış çətinlikləri, həmçinin logistika və tranzit xərcləri kimi problemlərlə üzləşirlər.
Təmiz texnologiyalara keçid üçün tələb olunan ilkin investisiyalar da çox vaxt kifayət qədər yüksək olur.
Bununla belə, hökumətlər, beynəlxalq tərəfdaşlar və yerli bizneslər yaşıl keçidi birlikdə həyata keçirmək yollarını axtarırlar. Bu, müxtəlif siyasət mexanizmləri, maliyyə alətləri və ixtisaslaşmış "traksiya mərkəzləri" (bir növ dartma - red.) vasitəsilə edilir.
Aygün Mirakif
