Yüzmilyonlarla manatlıq kibercinayətlə bağlı işdə vəkillər məhkəmə tərkibinə etiraz ediblər

Külli miqdarda vəsaitin leqallaşdırılması, vergidən yayınma və kibercinayətdə ittiham olunan Bahadır Qasımov, İkram Qasımov, Fərhad Qasımov, Cavid Əzizov, Vəli Əliyev və Anar Əhmədovun cinayət işi üzrə məhkəmə prosesi keçirilib.

Oxu.Az-ın məlumatına görə, Bakı Ağır Cinayətlər Məhkəməsində hakim Anar Sadıqovun sədrliyi ilə keçirilən prosesdə vəkillər bir neçə şahidin dindirilməsi ilə bağlı vəsatət veriblər.

Məhkəmə vəsatəti təmin etməyib. Bildirilib ki, vəsatətdə qeyd olunan məsələlər cinayət işi üçün zəruri hesab olunmur.

Vəkil Kamandar Nəsibov etiraz edərək deyib ki, bu, vəsatəti təmin etməmək üçün əsas deyil:

"Bəzi şahidlər müdafiə etdiyim şəxsin əleyhinə ifadələr veriblər. Gəlsinlər, məhkəmədə də dindirilsinlər".

Daha sonra təqsirləndirilən şəxsin vəkilləri məhkəmə tərkibinə etiraz ediblər.

Hakim müdafiə tərəfinə məhkəmə tərkibinə yazılı etiraz hazırlamaq üçün vaxt verib.

Məhkəmə prosesi aprelin 18-də davam edəcək.

Qeyd edək ki, ötən il Daxili İşlər Nazirliyinin Kibercinayətkarlıqla Mübarizə Baş İdarəsi Yasamal rayonu ərazisində yerləşən ofisdə qanunsuz pul köçürmələri həyata keçirilməsinə qarşı əməliyyat keçirib.

Əməliyyatla mütəşəkkil cinayətkarlıqla məşğul olmaqda şübhəli bilinən altı nəfər - Qasımov Bahadır Ağaqulu oğlu, onun qardaşı Qasımov İkram Ağaqulu oğlu, onların əmisi oğlu Qasımov Fərhad Etibar oğlu, Əzizov Cavid Hacı oğlu, Əliyev Vəli Ağamalı oğlu və Əhmədov Anar Şamil oğlu həbs ediliblər.

İttihama görə, onlar xarici ölkədən Azərbaycana, Azərbaycandan xarici ölkəyə qanunsuz pul vəsaitləri köçürüblər. Həmçinin qanunsuz olaraq bank fəaliyyəti həyata keçirməklə külli miqdarda vergi ödəməkdən yayınıblar. Dəstə üzvləri bu işlərlə bağlı öz aralarında vəzifə bölgüsü də aparıblar.

Pulların leqallaşdırılması Bakının Yasamal rayonunda, İstanbul və Dubaydakı ofislərdə həyata keçirilib.

Şirkət vasitəsilə xarici ölkələrə ümumilikdə 254 milyon 409 min 947 manat qanunsuz pul köçürülüb. Həmin vəsaitin bir faizi - 2.5 milyon manatı xidmət haqqı kimi onların özünə qalıb.

Ofisdə və İ.Qasımovun yaşadığı evdə axtarış zamanı 1.5 milyon dollar, 1.4 milyon manat, ABŞ istehsalı olan odlu silahlar, ümumi dəyəri bir milyon manata yaxın qiymətləndirilən 100-dək qızıl-brilyant əşyalar tapılıb. Qızıl-zinət əşyalarının ölkəyə qaçaqmalçılıq yolu ilə gətirildiyi bildirilir.

Həbs edilmiş şəxslərin özlərinin və ailə üzvlərinin çoxsaylı əmlakı, eləcə də 100-ə yaxın bahalı avtomobilin, digər minik vasitələrinin üzərinə həbs qoyulub.

Hesablamalarla bütün əmlakların ümumi dəyərinin yarım milyard manata yaxın olduğu müəyyən olunub.