Deputat: “Putin bir gün deyəcək ki, Qarabağdakı sülhməramlılarıma təhlükə var və onları müdafiə etməliyəm”

“Rusiya sülhməramlıları Qarabağda yerləşdiyi gündən bizim üçün təhlükə mənbəyidir. Onların icazəsi, himayəsi və tapşırığı ilə ermənilər təxribatlar həyata keçirir”.

Bu sözləri Azxeber.com-a açıqlamasında Milli Məclisin deputatı Elman Məmmədov deyib.

Deputat onlara sülhməramlı demədiyini bildirib:

“2008-ci il Gürcüstan məsələləri yadınızdadır, Osetiyada Rusiya hərbçiləri sülhməramlı kimi iştirak edirdi və Gürcüstan özünün ərazi bütövlüyünə görə əməliyyat keçirmək istədi və Rusiya dedi ki, bu, bizim sülhməramlılara təhlükədir. Hücum etdi, nəticəsi də məlumdur. Həmin o məramlılar ki, mən heç vaxt onlara sülhməramlı demirəm. Rusiya hərbi kontingenti ərazimizdə yerləşib. Yəni, bunlar yerləşdiyi gündən bizim üçün təhlükə mənbəyidir.

Onların icazəsi, himayəsi və tapşırığı ilə ermənilər o təxribatları həyata keçirir. Biz ona cavab vermək istəyirik, veririk də. Belə olanda onlar sülhməramlı kimi hərəkətə keçir və hədəfdə olurlar. Belə olan tərzdə bir gün görəcəksən ki, bu gün Ukraynaya müdaxilə edən həmin Putin bir gün də deyəcək ki, mənim Azərbaycanda olan hərbi kontingentimə, sülhməramlılarıma qarşı təhlükə var və onları orada müdafiə etməliyəm. Yəni, ermənilər çox məharətlə bu məsələlərdən istifadə edə bilərlər, onlarla bizi üzbəüz qoya bilərlər və burada da çox xoşagəlməz hallar ola bilər”.

Deputat həmçinin qeyd edib ki, separatçıların ərazimizdən çıxarılması üçün tədbirlər görülməlidir:

“Fevral ayının 22-də iki dövlət arasında imzalanan bəyannaməyə əsasən, biz bir-birimizin ərazi bütövlüyümüzə və sərhədlərimizin toxunulmazlığına hörmət etməliyik və eyni zamanda bizim hər birimizin ərazimizdə hansısa bir separatçı cinayətkar, qeyri-qanuni qüvvələr meydana çıxıb bizim dövlətçiliyimizə, təhlükəsizliyimizə təhlükə yaradarsa, onun ləğv olunmasına biz birlikdə tədbir görməliyik. Cənab Prezidentimiz geosiyasi, geopolitik siyasətlə bu məsələlərdə müəyyən qabaqdangəlmişik edib. Bu gün ərazimizdə mövcud olan həmin o separatçı, terrorçuların tək bizim tərəfimizdən yox eyni zamanda bizimlə müqaviləyə imza atan dövlətin hərbçilərinin köməyi ilə onların ləğv olunması, məhv olunması və ərazimizdən çıxarılması üçün tədbirlər görülməlidir. Əgər ikinci tərəf imzasına hörmət etsə və münasibətlərdə səmimi olsa, bunu etməlidir”.