"Ölkədə rəqəmsal inkişafın sürətlənməsi fonunda kibertəhlükəsizlik məsələləri daha da aktuallaşıb və dövlət siyasətinin əsas istiqamətlərindən birinə çevrilib".
Oxu.Az xəbər verir ki, bunu İnnovasiya və Rəqəmsal İnkişaf Agentliyinin İdarə Heyətinin sədri Fərid Osmanov Bakıda keçirilən Azərbaycan Kibertəhlükəsizlik Mərkəzinin (AKM) 7-ci məzun günü çərçivəsində jurnalistlərə açıqlamasında deyib.
O bildirib ki, bu ilin 27 fevral tarixində ölkədə rəqəmsal inkişafın sürətləndirilməsi üzrə 2026-2028-ci illəri əhatə edən Fəaliyyət Planı Prezident tərəfindən təsdiq edilib:
"Həmin sənəddə kibertəhlükəsizlik əsas icra sütunlarından biri kimi müəyyənləşdirilib. Fəaliyyət Planı çərçivəsində milli kibertəhlükəsizlik ekosisteminin qurulması, bu sahədə fəaliyyətin gücləndirilməsi və xüsusilə insan kapitalının inkişafı mühüm əhəmiyyət daşıyır".
F.Osmanov qeyd edib ki, Azərbaycan Kibertəhlükəsizlik Mərkəzi artıq dördüncü ildir fəaliyyət göstərir və Çex Texniki Universiteti ilə əməkdaşlıq çərçivəsində işini davam etdirir:
"Bu günədək müdafiə və hücum istiqamətləri üzrə 420-dən çox mütəxəssis hazırlanaraq əmək bazarına təqdim edilib. Onların 90 faizdən çoxu məşğulluq əldə edib və işlə təmin olunub".
İdarə Heyətinin sədri vurğulayıb ki, AKM yalnız kadr hazırlığı ilə kifayətlənmir, eyni zamanda kibermarifləndirmə istiqamətində də fəaliyyət göstərir:
"Hesabat dövründə 7 mindən çox şəxs kibermarifləndirmə təlimlərinə cəlb olunub. Həmçinin 250-dən artıq rəhbər vəzifəli şəxs kibertəhlükəsizlik sahəsində biliklərə yiyələnib".
F.Osmanov əlavə edib ki, bu gün keçirilən məzun günündə AKM-in yeddinci dalğası üzrə 60 kibertəhlükəsizlik mütəxəssisi məzun olur və onlar əmək bazarına cəlb ediləcəklər:
"Bu proqramın xüsusi əhəmiyyətli hissələrindən biri də ondan ibarətdir ki, 60 məzun arasından seçilən beş nəfər qabaqcıl rəqəmsallaşma və kibertəhlükəsizlik şirkətlərində, müəssisələrində bir aylıq ödənişsiz beynəlxalq təcrübə proqramında iştirak etmək imkanı qazanacaq".
