"Buffy" ulduzunun ölüm səbəbi məlum oldu

Mişel Traxtenberqin faciəli vəfatından təxminən iki ay sonra tibbi ekspertlər nəhayət ki, "Buffy the Vampire Slayer", "EuroTrip" və "Gossip Girl" kimi kultlaşmış layihələrdəki rolları ilə milyonlarla tamaşaçıya tanış olan 39 yaşlı aktrisanın dəqiq ölüm səbəbini müəyyən ediblər. Nyu-York Baş Məhkəmə-Tibbi Ekspertiza İdarəsi rəsmi olaraq təsdiq edib ki, Traxtenberqin ölümü şəkərli diabet ağırlaşması nəticəsində baş verib.

Oxu.Az-ın məlumatına görə, bu barədə "NBC News" xəbər yayıb.

Həkimlər hadisəni təbii ölüm kimi təsnif ediblər, lakin aktrisanın hansı tip diabetdən əziyyət çəkdiyini dəqiqləşdirməyiblər.

Qeyd edək ki, Traxtenberqin cəsədinin yarılması dini səbəblərə görə aparılmayıb - aktrisa yəhudi ailəsindən olub (atası Almaniyadan, anası isə SSRİ-dən idi). Lakin toksikoloji tədqiqatın nəticələri ekspertlərə onun vəfatının səbəbləri haqqında yekun nəticələr çıxarmağa imkan verib.

Mayo Klinikasının məlumatlarına görə, diabet qeyri-alkoqol mənşəli qaraciyər piylənməsi xəstəliyinin inkişaf riskini əhəmiyyətli dərəcədə artıra bilər - bu, orqanın həddindən artıq miqdarda piy topladığı vəziyyətdir. Bu xəstəliyin yan təsiri çox vaxt qaraciyərin ağır çapıqlaşması və ya sirrozu olur ki, bu da orqanın transplantasiyasını tələb edə bilər.

Adı açıqlanmayan mənbə aktrisanın ölümündən qısa müddət əvvəl qaraciyər köçürülməsi əməliyyatı keçirdiyi barədə məlumatı təsdiqləyib. Bundan əvvəl mediada onun ölümünün mümkün səbəbinin köçürülmüş orqanın bədən tərəfindən rədd edilməsi ola biləcəyi barədə xəbərlər yayılmışdı.

Xatırladaq ki, Mişel Traxtenberqin cəsədi 2024-cü il fevralın 26-da anası tərəfindən Manhettendəki elit yaşayış kompleksində aşkar edilib. Hadisə yerinə gələn həkimlər aktrisanın ölümünü təsdiqləyiblər. Traxtenberqə yaxın olan insanlar qeyd ediblər ki, son fotoşəkillərdə o, taqətsiz və zəif görünürdü.

Traxtenberq karyerası ərzində bir neçə "Young Artist Award" mükafatına layiq görülüb və "Teen Choice Awards" mükafatına namizəd olub.