"Bakıda keçirilən Azərbaycan-Slovakiya biznes forumunda hər iki ölkədən 100-ə yaxın şirkət və qurum təmsil olunur".
Oxu.Az xəbər verir ki, bunu AZPROMO-nun icraçı direktoru Yusif Abdullayev Bakıda keçirilən Azərbaycan-Slovakiya biznes forumunda bildirib.
"Bugünkü forumda Slovakiya nümayəndə heyətini qida və içki istehsalı, mühəndislik, avtomobil və dəmir yolu texnologiyaları, aerokosmik sənaye, müdafiə və təhlükəsizlik, su təsərrüfatı, enerji və turizm sahələrində fəaliyyət göstərən şirkətlər təmsil edir. Azərbaycan tərəfi isə kənd təsərrüfatı, qida istehsalı, fındıq emalı, şərabçılıq, tikinti materialları, turizm, logistika, daşınmaz əmlak və maliyyə sektorlarında fəaliyyət göstərən şirkət və qurumlardan ibarətdir", - deyə o bildirib.
Y.Abdullayev qeyd edib ki, AZPROMO "vahid pəncərə" prinsipi əsasında fəaliyyət göstərərək investorlara Azərbaycan bazarı, prioritet sahələr, mövcud güzəştlər, sənaye zonaları və investisiya layihələri barədə dəstək göstərir.
"Biz eyni zamanda "Invest in Azerbaijan" platforması vasitəsilə investorlara təqdim olunan xidmətlərin rəqəmsallaşdırılması istiqamətində iş aparırıq. "Made in Azerbaijan" brendini isə ixrac və alıcı missiyaları, beynəlxalq sərgilər, bazar araşdırmaları və biznes forumları vasitəsilə təşviq edirik", - deyə o vurğulayıb.
AZPROMO-nun icraçı direktoru xatırladıb ki, ötən ilin sentyabrında keçirilən ilk Azərbaycan Beynəlxalq İnvestisiya Forumu 1 000-ə yaxın iştirakçını bir araya gətirib.
"Həmin forumun yekununda dəyəri 10 milyard ABŞ dollarından çox olan investisiya sənədləri imzalanıb. Bu məbləğin 7 milyard ABŞ dollarından çoxu qeyri-neft sektoru üzrə layihələri əhatə edib", - deyə Y.Abdullayev bildirib.
O əlavə edib ki, ikinci Azərbaycan Beynəlxalq İnvestisiya Forumu bu il sentyabrın 25-26-da keçiriləcək və Slovakiya tərəfi də həmin tədbirə dəvət olunub.
Daha çox foto burada: PhotoStock.az
