Etibar məsələsi, yoxsa inad? - PKK sözünə əməl edəcəkmi?

Qırx ildən çoxdur ki, Türkiyə dövləti ilə mübarizə aparan və ona ciddi problemlər yaradan PKK terror təşkilatının qurucusu Abdullah Öcalan Milliyyətçi Hərəkat Partiyasının (MHP) sədri Dövlət Bağçalının çağırışına əsasən, fevralın 27-də onu ziyarət edən DEM Partiyası heyəti ilə birlikdə tarixi açıqlama verdi.

Öcalan təşkilatı qurultay çağırmağa, silahı yerə qoymağa və özünü ləğv etməyə çağırdı. Lakin PKK və onun Suriya qolu YPG bu çağırışı müsbət qarşılasalar da, silahı yerə qoyacaqları təqdirdə demokratik mübarizə aparacaqlarına şəraitin yaradılması və təhlükəsizliklərinə zəmanət tələb ediblər. Qeyd etmək yerinə düşər ki, PKK artıq atəşkəs də elan edib. Bu barədə qondarma PKK İcraiyyə Komitəsi bəyanat yayıb. Açıqlamada təşkilatın rəhbəri Abdullah Öcalanın çağırışına əməl edildiyi bildirilib.

Bəs PKK/YPG silahlı mübarizədən əl çəksə, siyasi mübarizə necə olacaq? Ələlxüsus, terrorçular qanuni siyasi mübarizəyə qoşula bilərlərmi? Ən əsası isə - Öcalanın aqibəti necə olacaq?

Oxu.Az-ın suallarını Türkiyənin "Yeni Akit" qəzetinin Ankara bürosunun xəbərlər departamentinin rəhbəri Muhammet Kutlu cavablandırıb. O, Öcalanın çağırışının Türkiyə və dünya gündəmində geniş müzakirəyə səbəb olduğunu bildirib:

"Prezident Rəcəb Tayyib Ərdoğan Öcalanın bəyanatını şərh edərək bildirdi ki, Türkiyəni qandallardan xilas etmək mübarizəmizdə qarşımıza çıxan əngəllərdən biri də məlum terror bəlası idi. "Türkiyənin 40 ildir ki, terrorla verdiyi imtahanda çox ciddi problemlərlə rastlaşdıq. Terror, sadəcə, dövlətimizin bütövlüyü və millətimizin rifahını deyil, eyni zamanda, demokratiyamızı, iqtisadiyyatımızı və dinc siyasəti də hədəf aldı. Ölkəmizdə uzun illərdir ki, terror təhlükəsi siyasətçilər tərəfindən siyasəti formalaşdırmaq üçün alət kimi istifadə olunur. İndi isə qarşımızda tarixi bir fürsət var. İmperializmin bu coğrafiyada hiyləgər və çirkin planının pozulması, sadəcə, ölkəmizin deyil, regionumuzun da inkişafı üçün əlverişli olacaq. Türkü və kürdü ilə bu millətin heç bir fərdi prosesi çıxılmaz vəziyyətə gətirən heç kimi bağışlamayacaq. İnanırıq ki, bu kritik dövrü sakit, soyuqqanlı və səmimi idarə etmək ən doğru qərardır. Təbii ki, bu problemin tamamilə bitməsini istəməyənlər də olacaq, hər cür təxribata qarşı ən yüksək səviyyədə ehtiyatlı olmaq üçün bütün lazımi tədbirləri görəcəyik", - prezident dedi.

Təbii ki, terror təşkilatının tərk-silah edilməsi ilə bağlı narahatlığını gizlətməyən CHP də prosesə müdaxilə etmək üçün açıqlamalar verir. Yeri gəlmişkən, CHP sədri Özgür Özel ölkə başçısını qaralamaq məqsədilə iddia edib ki, bir ildir ki, şəxsən Ərdoğanın təlimatları əsasında Öcalanla gizli danışıqlar aparılır. Ədalət və İnkişaf Partiyasının sözçüsü Ömər Çelik isə bildirib ki, bütün proseslər şəffaf şəkildə aparılır və dövlət heç kimlə alış-veriş etmir. Ədliyyə naziri Yılmaz Tunç da Öcalanın bəyanatını şərh edərək bildirib ki, "terror təşkilatı öz liderinin çağırışına cavab verməsə, qanunun aliliyi çərçivəsində bu mübarizə qətiyyətlə davam edəcək". MHP lideri Dövlət Bağçalının apreldəki çağırışından sonra PKK-nın siyasi qanadı olan DEM Partiyası heyətinin də məsələyə ciddi yanaşdığını və prosesi yaxından müşahidə etdiyini görürük.

Lakin Qəndil bölgəsindəki (terrorçuların yerləşdikləri əsas region) terrorçular Öcalanın çağırışına məsafəli davranırlar, hətta "silahı niyə yerə qoymalıyıq?" kimi açıqlamalar verənlər də olur. Lakin onlar Öcalanın çağırışını qulaqardı edə bilməzlər, çünki onun kürdlər arasında xüsusi çəkiyə malik olduğunu və simvolik də olsa, imicinin qaldığını bilirlər. Ona görə də bu bəyanata mənfi cavab verib təklifi geri çevirə bilməzlər. Amma prosesi uzatmağa cəhd də istisna deyil. Lakin silahı yerə qoymayıb Türkiyəyə hücumlarını davam etdirəcəklərini açıqlamağa cəsarət etməyəcəklər. Çünki onlar da bilirlər ki, bu halda Türkiyə hərtərəfli əməliyyatla onları darmadağın etməyə hazırdır".

"Təbii ki, terrorçular yenə də faəliyyətlərini davam etdirsələr, Türkiyədəki kürdlər arasında hörmət və etibarlarını itirəcək, eləcə də demokratik yolla siyasi arenada qalmaq istəyən DEM Partiyası üçün problemlər yaranacaq. Beləliklə, terror təşkilatı ilə onun siyasi qanadı arasında parçalanma meydana gələcək. Zənnimcə, onların heç biri bunu istəmir. Düşünürəm ki, onlar prosesi mümkün qədər uzatmağa çalışacaqlar, amma son qərarları silahı yerə qoymaq və təşkilatın ləğvi olacaq", - deyə müsahibimiz əlavə edib.

Mərahim Nəsib