"Haber Global": "Türkiyə - Azərbaycan qardaşlığı sarsılmazdır"

"Türkiyə Prezidenti Rəcəb Tayyib Ərdoğan ilə Azərbaycan Prezidenti İlham Əliyev arasındakı qardaşlıq əlaqəsi o qədər güclüdür ki, masalarda qurulan bütün oyunları pozdu".

Bu barədə "Haber Global"ın efirində yayımlanan verilişdə bildirilib.

Qeyd edilib ki, müasir və müstəqil Azərbaycanın qurucusu Heydər Əliyevdən miras qalan "Bir millət, iki dövlət" ideyası bu sarsılmaz qardaşlığın bir növ xülasəsidir.

"Türkiyə qardaş Azərbaycanı tanıyan ilk ölkə oldu. İki ölkə arasındakı diplomatik münasibətlər 1992-ci ildə başladı. O gündən bəri münasibətlər davamlı inkişaf etdi. Ankara və Bakı arasındakı qardaşlıq əlaqəsi, Əliyev və Ərdoğanın qurduğu nümunəvi dostluq və əməkdaşlıqla tamamilə yeni bir səviyyəyə qalxdı.

İlham Əliyevin ən böyük məqsədlərindən biri atası Heydər Əliyevin mirasını davam etdirmək, Qarabağda erməni zülmünə qarşı çıxaraq 30 illik vətən həsrətinə son qoymaq idi və bu, həyata keçirildi. Qarabağda qələbə tezliklə əldə edildi. Ərdoğanın rəhbərliyində Türkiyə, Əliyevin rəhbərliyində isə Azərbaycan beynəlxalq səhnədəki regional və qlobal rolunu möhkəmləndirdi. Qarabağ qələbəsi ilə Cənubi Qafqazda balans yenidən formalaşdı.

Prezident Ərdoğanın 15 iyun 2021-ci ildə Şuşaya səfəri ilə münasibətlər fərqli bir səviyyəyə - strateji müttəfiqlik səviyyəsinə qaldırıldı.

Qarabağ qələbəsindən sonra qərb qüvvələri Ərdoğan-Əliyev birliyini pozmaq üçün davamlı olaraq təxribatçı təşəbbüslər irəli sürür. Son olaraq Qəzza bəhanəsi ilə bu birliyə xələl gətirməyə çalışsalar da, buna nail ola bilmədilər. Bu təxribat necə məğlubiyyətə uğradısa, sonrakı analoji təşəbbüslər də uğursuz olacaq", - verilişdə bildirilib.