Xocavənd rayonunun Hadrut qəsəbəsinə yola salınan ilk köç karvanı doğma yurda çatıb.
Oxu.Az xəbər verir ki, qəsəbəyə köçən sakinlərin qarşılanma mərasimi keçirilib.
Mərasimdə Qaçqınların və Məcburi Köçkünlərin İşləri üzrə Dövlət Komitəsini, Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəliyini təmsil edən şəxslər iştirak ediblər.
Ailələrə mənzillərin açarları təqdim edilib.
Bu gün Xocalı rayonunun Badara kəndinə yola salınan köç karvanı kəndə çatıb.
Oxu.Az xəbər verir ki, sakinlərin qarşılanma mərasimi keçirilib.
Onlara mənzillərinin açarları təqdim edilib.
Prezident İlham Əliyevin tapşırığına uyğun olaraq, işğaldan azad edilmiş ərazilərə Böyük Qayıdış davam etdirilir.
Oxu.Az xəbər verir ki, sentyabrın 12-də Bakının Qaradağ rayonundan Xocavənd rayonunun Hadrut qəsəbəsinə və Xocalının Badara kəndinə ilk köç karvanı yola salınıb.
Köç edənlər respublikanın müxtəlif yerlərində, əsasən, yataqxanalarda, sanatoriya və inzibati binalarda müvəqqəti məskunlaşmış ailələrdir. Bu mərhələdə Hadruta 10 ailə - 41 nəfər, Xocalı rayonunun Badara kəndinə isə 14 ailə - 55 nəfər köçürülür.
Doğma yurda qayıdan sakinlər hərtərəfli dövlət qayğısı ilə əhatə olunduqlarına görə Prezident İlham Əliyevə və Birinci vitse-prezident Mehriban xanım Əliyevaya təşəkkür ediblər. Onlar, həmçinin torpaqlarımızı işğaldan azad edən rəşadətli Azərbaycan Ordusuna, qəhrəman əsgər və zabitlərimizə minnətdarlıqlarını bildirib, bu yolda canlarından keçən şəhidlərimizə rəhmət diləyiblər.
Rövşən Əsədov
