Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev ATƏT-in Minsk qrupunun Rusiyadan olan keçmiş həmsədri Vladimir Kazimirovun “Nezavisimaya qazeta”da dərc olunan və Dağlıq Qarabağ münaqişəsinin mahiyyətini təhrif edən qərəzli məqaləsinə cavab verib.
Oxu.Az xəbər verir ki, “Nezavisimaya qazeta”da nəşr olunan “Ermənistan-Azərbaycan, Dağlıq Qarabağ münaqişəsi Vladimir Kazimirovun əyri güzgüsündə” sərlövhəli məqaləsində H.Hacıyev Ermənistanın Dağlıq Qarabağ münaqişəsi ilə bağlı BMT Təhlükəsizlik Şurasının dörd qətnaməsini icra etməməsini daha çox beynəlxalq vasitəçilərin işlərini tam yerinə yetirə bilməməsi, onların erməniləri beynəlxalq hüquq və xalqların dinc yanaşı yaşama qaydalarına hörmət etməyin zəruri olmasına inandıra bilməməsi ilə bağlı olduğunu vurğulayıb.
“Azərbaycan torpaqlarının işğalı davam edir. Özü də təcavüzkara qarşı beynəlxalq qınama və sülhə məcburetmə tədbirləri tətbiq olunmur. Bunun səbəbi Azərbaycana qarşı təcavüzkar siyasət yürüdən “qeyri-konstruktiv mövqe” yox, işğalçı tərəfin bütün beynəlxalq qərarları, həmçinin məcburi xarakter daşıyan BMT Təhlükəsizlik Şurasının qətnamələrini sabotaj etməsidir”, - H.Hacıyev bildirib.
Azərbaycan XİN-in sözçüsü söyləyib ki, V.Kazimirov sənədli ekvilibristikaya müraciət edərək hər vəchlə təcavüzkarı müdafiə edir. Eyni zamanda, Ermənistanın təmas xəttində monitorinqlə bağlı tədbirlər haqqında uzun-uzadı danışaraq “stutus-kvo”nu uzatmaqla bağlı mövqeyinə müəyyən dəstək illüziyası yaratmaqla vəziyyəti yalnız qəlizləşdirir.
“Hərçənd hər cür insidentdən qaçmağın yeganə və ən etibarlı yolu Ermənistanın işğalçı qüvvələrinin Azərbaycan ərazisindən çıxarılması olduğu açıq-aydın görünür. Yalnız bu halda münaqişənin hazırda davam edən danışıqlar prosesi çərçivəsində yekun siyasi həlli istiqamətində irəliləyiş olacaq”, - deyə XİN-in sözçüsü əlavə edib.
Məqalədə H.Hacıyev eyni zamanda V.Kazimirova sualla müraciət də edib: “Özünüzü səlahiyyətli şəxs hesab edirsinizsə, nə üçün həmsədrlər 1996-cı ilə qədər münaqişənin həllinə nail ola bilməyib?!”.
“Bundan başqa, sizin kimi sabiq, yüksəkvəzifəli diplomatın BMT-nin Nizamnaməsinin dövlətin müdafiə və təcavüzün qarşısının alma hüququna dair 51-ci maddəsinə baxması artıq olmazdı. Bu, beynəlxalq münasibətlər sisteminin əsası olan sənədin, yaddaşınızda bərpa edilməsi sizi qurbanın özünün günahkar olmasını deməyinizə, işğalçının isə az qala “sülh göyərçini” kimi qələmə verməyinizə səbəb olan təhriflərin aradan qaldırılmasına yardımçı olmalıdır”, - H.Hacıyev sözünü yekunlaşdırıb.
N.О.
www.oxu.az
