Keçmiş məcburi köçkün: "Ağdama qayıdacağımıza ümidimi üzsəm, ölərdim"

"Bu günümüzə min şükür olsun! Arzularımız çin oldu".

Bu fikirləri Oxu.Az-a açıqlamasında bu gün Ağdam rayonunun Kəngərli kəndinə köç edən keçmiş məcburi köçkün Tavat Əsəd qızı Allahverdiyeva deyib.

O qeyd edib ki, 1992-ci ildə çıxdığı Ağdama 75 yaşında qayıdır:

"Heç vaxt ümidimizi üzmədik. Ümidimi üzsəm, şəxsən mən ölərdim. Allah Prezidentimizə uzun ömür versin, şəhidlərimizə rəhmət eləsin, qazilərimizə cansağlığı versin, onların sayəsində qayıdırıq".

Qeyd edək ki, bu gün Kəngərli kəndinə daha 50 ailə - 207 nəfər köçürülür.

Hazırda Qarabağda və Şərqi Zəngəzurda, oraya köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 40 mindən çox insan yaşayır.

Məhərrəm Əliyev