"Sosial medianın Azərbaycan seqmentində yad təsirlərin Azərbaycan cəmiyyətinin fikri kimi göstərilməsi əsas problemlərdən biridir".
Oxu.Az-ın Şamaxıya ezam olunmuş əməkdaşı xəbər verir ki, bunu "APA Holding" MMC-nin prezidenti Vüsalə Mahirqızı "Müasir informasiya məkanı və dini etiqad azadlığı" mövzusunda konfrans çərçivəsində təşkil olunmuş "Dini etiqadın sərbəst ifadəsi və söz azadlığı" adlı panel sessiyada deyib:
"Son dövrlər azərbaycanlı dindarların antitolerant münasibəti görünür. Bizim dindən öyrəndiyimiz əsas məsələ tolerantlıq, müxalif fikrə, tənqidə dözümlülük idi. Hesab edirəm ki, hazırda Azərbaycan mediasının dini məlumatlarla bağlı həssaslığı on qat artmalıdır. Çünki sosial şəbəkələrdə adi məlumatlar belə çox ciddi manipulyasiya vasitəsinə çevrilə bilir. Bununla mübarizə aparmaq üçün media nümayəndələri ilə treninqlər, qarşılıqlı görüşlər çox olmalıdır", - deyə V.Mahirqızı bildirib.
Qeyd edək ki, tədbirin media tərəfdaşları "Global Media Group" və şirkətə daxil olan Oxu.Az, Caliber.az, Media.az, Baku.ws və PhotoStock.az saytları, "Report" informasiya agentliyi və Baku TV telekanalıdır.
Əzizə İsmayılova
