Rusiya DİN-nin Mərkəzi federal dairə üzrə Baş idarəsinin əməkdaşları Moskvada girovun azad edilməsi üzrə əməliyyat keçiriblər, dəstənin bir üzvü öldürülüb, digər ikisi saxlanılıb.
Xüsusi əməliyyat zamanı cinayətkar qruplaşmanın təşkilatçısı polislərə atəş açıb və xüsusi təyinatlılar tərəfindən öldürülüb.
Cinayətkarlar gənc insana görə 700 min ABŞ dolları istəyirmişlər. 20 yaşlı azərbaycanlı aprelin 18-də Moskvada yaşadığı evin yaxınlığından qaçırılıb. Moskvadakı restoranlardan birinin sahibinin oğluna bir neçə kişi hücum edib, tapançanı başına dirəyərək və ölümlə qorxudaraq, avtomobilə əyləşdirib və naməlum istiqamətdə aparıblar. İki saatdan sonra oğlanın atasına zəng edən naməlum şəxslər oğlunun azad edilməsi üçün 700 min dollar məbləğində pul istəyiblər.
Girovun azad edilməsi üzrə xüsusi əməliyyat aprelin 25-dən 26-na keçən gecə, Moskva vilayətinin Naro-Fominsk rayonunun Aprelevka kəndində aparılıb.
“Polislərə silahlı müqavimət göstərildi: cinayətkar qruplaşmanın lideri Rafiq Mirzəyev Makarov tapançasından polis əməkdaşlarına bir neçə atəş açdı. Bundan sonra xüsusi təyinatlı polis qüvvələrinin əməkdaşlarından biri tabel silahından atəş açaraq, Mirzəyevi zərərsizləşdirdi” – deyə, İdarədən bildiriblər.
“Girov azad edilib. Azad olunduğu anda və eləcə də, girov saxlanıldığı bir həftə ərzində o, istilik sisteminin batareyasına zəncirlə bağlanılmış vəziyyətdə olub. Zərərçəkənin sözlərinə görə, onu daim güclü təsirli trankivilizatorlar qəbul etməyə məcbur edir, döyür və öldürməklə hədələyirdilər” – deyə, mətbuat xidmətindən bildiriblər.
Lent.Az-ın verdiyi xəbərə görə, xüsusi əməliyyat zamanı Rafiqin iki silahdaşı – Ruslan Hacısəlimov və Samir Abdullayev polis tərəfindən həbs edilib.
www.vesti.ru
